ಬಾಗ್ದಾದ್‌ನ ಅವಳಿ ಆತ್ಮಾಹುತಿ ಬಾಂಬ್ ದಾಳಿ ಹೊಣೆಗಾರಿಕೆ ವಹಿಸಿಕೊಂಡ ಇಸ್ಲಾಮಿಕ್ ಸ್ಟೇಟ್ | Janata news
980
ಬಾಗ್ದಾದ್ : ಕೇಂದ್ರ ಬಾಗ್ದಾದ್‌ನ ಜನದಟ್ಟಣೆಯ ಮಾರುಕಟ್ಟೆಯಲ್ಲಿ ಗುರುವಾರ ಸಂಭವಿಸಿದ ಅವಳಿ ಆತ್ಮಾಹುತಿ ಬಾಂಬ್ ದಾಳಿಯ ಜವಾಬ್ದಾರಿಯನ್ನು ಭಯೋತ್ಪಾದಕ ಸಂಘಟನೆ ಇಸ್ಲಾಮಿಕ್ ಸ್ಟೇಟ್ ವಹಿಸಿಕೊಂಡಿದೆ.
ಮಧ್ಯರಾತ್ರಿಯ ನಂತರ, ಐಸಿಸ್ ತನ್ನ ಆನ್‌ಲೈನ್ ಪ್ರಚಾರ ಚಾನೆಲ್‌ಗಳ ಮೇಲಿನ ದಾಳಿಯ ಹೊಣೆಗಾರಿಕೆಯನ್ನು ಪ್ರಕಟಿಸಿದೆ.
ಇರಾಕ್ ರಾಜಧಾನಿ ಬಾಗ್ದಾದ್ ನಲ್ಲಿ ನಿನ್ನೆ ಗುರುವಾರ ನಡೆದ ಈ ಅವಳಿ ಆತ್ಮಾಹುತಿ ಬಾಂಬ್ ದಾಳಿಯಲ್ಲಿ 32 ಜನರು ಸಾವನ್ನಪ್ಪಿದರು ಮತ್ತು 110 ಮಂದಿ ಗಾಯಗೊಂಡಿದ್ದರು.
ಪ್ರಾಣ ಕಳೆದುಕೊಂಡವರು ದಾಳಿಯ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಮತ್ತು ಗಾಯಗೊಂಡವರಲ್ಲಿ ಹೆಚ್ಚಿನವರಿಗೆ ಚಿಕಿತ್ಸೆ ನೀಡಿ ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿದೆ, ಎಂದು ಆರೋಗ್ಯ ಸಚಿವಾಲಯ ತಿಳಿಸಿದೆ.
ಮೊದಲ ಆತ್ಮಾಹುತಿ ಬಾಂಬರ್/ಉಗ್ರಗಾಮಿ ರಾಜಧಾನಿಯ ತಯರನ್ ಸ್ಕ್ವೇರ್ ನಲ್ಲಿನ ಕಿಕ್ಕಿರಿದ ಮಾರುಕಟ್ಟೆಯಲ್ಲಿ ಅನಾರೋಗ್ಯದ ನಾಟಕ ಮಾಡುವ ಮೂಲಕ ಜನರ ಗುಂಪನ್ನು ಸೆಳೆದಿದ್ದು, ನಂತರ ಅವನು ಸ್ಫೋಟಕ ಬಾಂಬ್ ನ್ನು ಸ್ಫೋಟಿಸಿದ್ದಾನೆ.
ಈ ಬಾಂಬ್ ಸ್ಪೋಟದಲ್ಲಿ ಗಾಯಾಳು ಬಲಿಪಶುಗಳಿಗೆ ಸಹಾಯ ಮಾಡಲು ಹೆಚ್ಚಿನ ಜನರು ಘಟನಾ ಸ್ಥಳಕ್ಕೆ ಬರುತ್ತಿದ್ದಂತೆ, ಎರಡನೇ ಆತ್ಮಾಹುತಿ ಬಾಂಬರ್ ತನ್ನ ಬಳಿಯಿದ್ದ ಸ್ಫೋಟಕಗಳನ್ನು ಸಿಡಿಸಿದ್ದಾನೆ, ಎಂದು ಆಂತರಿಕ ಸಚಿವಾಲಯ ತಿಳಿಸಿದೆ.
ತೆರೆದ ಮಾರುಕಟ್ಟೆಯಲ್ಲಿ, ಹಳೆಯ ಬಟ್ಟೆಗಳನ್ನು ರಸ್ತೆ ಬದಿಗಳಲ್ಲಿ ಮಾರಾಟ ಮಾಡಲಾಗುತ್ತದೆ, ದೇಶಾದ್ಯಂತ ಸುಮಾರು ಒಂದು ವರ್ಷದ ಕೋವಿಡ್-19 ನಿರ್ಬಂಧಗಳನ್ನು ತೆಗೆದುಹಾಕಿದ ನಂತರ ಜನರು ಇಲ್ಲಿ ಜೊತೆ ಸೇರುತ್ತಿದ್ದರು.
ಇಂತಹ ಹಿಂಸಾಚಾರವು ಬಾಗ್ದಾದ್‌ನಲ್ಲಿ 2003ರ ಅಮೇರಿಕ ನೇತೃತ್ವದ ಆಕ್ರಮಣದ ನಂತರದ ಪಂಥೀಯ ರಕ್ತಸ್ರಾವದ ಸಮಯದಲ್ಲಿ ಸಾಮಾನ್ಯವಾಗಿತ್ತು ಮತ್ತು ನಂತರ ಐಎಸ್ ಇರಾಕ್‌ನಾದ್ಯಂತ ವ್ಯಾಪಿಸಿ ರಾಜಧಾನಿಯನ್ನು ಗುರಿಯಾಗಿಸಿತ್ತು. ಆದರೆ 2017ರ ಕೊನೆಯಲ್ಲಿ ಗುಂಪಿನ ಪ್ರಾದೇಶಿಕ ಸೋಲಿನೊಂದಿಗೆ, ನಗರದಲ್ಲಿ ಆತ್ಮಾಹುತಿ ಬಾಂಬ್ ಸ್ಫೋಟಗಳು ವಿರಳವಾಗಿದ್ದವು.
