ಕಾಫಿತೋಟದಲ್ಲಿ ಪತ್ತೆಯಾದ ಬ್ರಿಟಿಷರ ಕಾಲದ 28 ನಾಣ್ಯಗಳನ್ನು ವಶಪಡಿಸಿಕೊಂಡ ಪೊಲೀಸರು! | ಜನತಾ ನ್ಯೂಸ್
ಸಕಲೇಶಪುರ : ತಾಲೂಕಿನ ಹಾಲೇಬೇಲೂರು ಗ್ರಾಮದ ಕಾಫಿ ತೋಟವೊಂದರಲ್ಲಿ ಭೂಮಿ ಅಗೆಯುವಾಗ ಕೂಲಿ ಕಾರ್ಮಿಕರಿಗೆ ಬ್ರಿಟಿಷರ ಕಾಲದ 28 ಬೆಳ್ಳಿ ನಾಣ್ಯಗಳು ಸಿಕ್ಕಿವೆ. ಆ ಬೆಳ್ಳಿ ನಾಣ್ಯಗಳನ್ನು ಸಕಲೇಶಪುರ ಗ್ರಾಮಾಂತರ ಠಾಣೆಯ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
1860-1904ರ ನಡುವೆ ಚಲಾವಣೆಯಲ್ಲಿದ್ದ 1 ರೂ. ಮುಖಬೆಲೆಯ ನಾಣ್ಯಗಳ ಮೇಲೆ ರಾಣಿ ವಿಕ್ಟೋರಿಯ ಚಿತ್ರವಿದೆ.
ಡಿ. 27ರಂದು ಹಾಲೇಬೇಲೂರು ಗ್ರಾಮದ ಶ್ಯಾಮ್ ಎಂಬುವರ ಕಾಫಿ ತೋಟದಲ್ಲಿ ಕೆಲಸ ಮಾಡುತ್ತಿದ್ದ ಕೂಲಿ ಕಾರ್ಮಿಕ ಹರೀಶ್ ಎಂಬ ವ್ಯಕ್ತಿಗೆ ಕೆಲ ನಾಣ್ಯಗಳು ಸಿಕ್ಕಿದ್ದು, ಇದರಲ್ಲಿ ಒಂದು ನಾಣ್ಯವನ್ನು ಹರೀಶ್ ಸ್ಥಳೀಯ ವ್ಯಕ್ತಿಗೆ ಮಾರಾಟ ಮಾಡಿದ್ದರು ಎಂದು ಹೇಳಲಾಗಿದ್ದು, ಬಳಿಕ ಕೆಲಸಗಾರರಿಗೆ ನಿಧಿ ಸಿಕ್ಕಿದೆ ಎಂಬ ಸುದ್ದಿ ಗ್ರಾಮದಲ್ಲಿ ಹರಡಿತ್ತು.
ಕಾರ್ಮಿಕ ಹರೀಶ್ನನ್ನು ಕರೆದು ವಿಚಾರಿಸಿದಾಗ ನನಗೆ ಬೆಳ್ಳಿಯಂತಿರುವ ಕೇವಲ 9 ನಾಣ್ಯ ಸಿಕ್ಕಿದೆ ಎಂದು ಹೇಳಿ ಮಾಲೀಕರಿಗೆ ಆ ನಾಣ್ಯಗಳನ್ನು ಒಪ್ಪಿಸಿದ್ದ.
ತಕ್ಷಣ ತೋಟದ ಮಾಲೀಕ ಶ್ಯಾಮ್, ಸಕಲೇಶಪುರ ಗ್ರಾಮಾಂತರ ಠಾಣೆ ಪೊಲೀಸರಿಗೆ ಈ ಕುರಿತು ಮಾಹಿತಿ ನೀಡಿ 9 ನಾಣ್ಯಗಳನ್ನು ಪೊಲೀಸರ ವಶಕ್ಕೆ ನೀಡಿದ್ದರು.
ಗ್ರಾಮಾಂತರ ಠಾಣೆಯ ಪಿಎಸ್ಐ ಬಸವರಾಜ್ ಹಾಗೂ ಸಿಬ್ಬಂದಿಗಳು ಸ್ಥಳಕ್ಕೆ ಆಗಮಿಸಿ ಹರೀಶ್ನನ್ನು ಬಂಧಿಸಿ, ವಾಟೆಗದ್ದೆ ಗ್ರಾಮದ ಅವನ ಮನೆಯ ಹಿಂಭಾಗ ಬಿಳಿ ಬಟ್ಟೆಯಲ್ಲಿ ಸುತ್ತಿದ್ದ ಸುಮಾರು 19 ನಾಣ್ಯಗಳನ್ನು ವಶಪಡಿಸಿಕೊಂಡಿದ್ದಾರೆ.