ಪ್ರೀತಿಸಿ ಮದುವೆಯಾದ ಗಂಡನ ಅಕ್ರಮ ಸಂಬಂಧ, ಎರಡು ವರ್ಷದ ಮಗುವಿನ ಜೊತೆ ತಾಯಿ ಆತ್ಮಹತ್ಯೆ! | JANATA NEWS
ಮಂಡ್ಯ : ಎರಡೂವರೆ ವರ್ಷದ ಮಗುವಿನೊಂದಿಗೆ ತಾಯಿಯೋರ್ವಳು ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಪಟ್ಟಣದ ಹೊರವಲಯ ಬಿಂಡಿಗನವಿಲೆ ರಸ್ತೆಯ ಕೆಂಚೇಗೌಡನಕೊಪ್ಪಲಿನಲ್ಲಿ ನಡೆದಿದೆ.
ನಾಗಮಂಗಲ ಪಟ್ಟಣದ ಬಿಂದೂ ಎಂಬಾಕೆಯೆ ತನ್ನ ಪುತ್ರಿ ಜಾಹ್ನವಿಯೊಂದಿಗೆ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಬಿಂದೂ ಐದು ವರ್ಷಗಳ ಹಿಂದೆ ಪೋಷಕರ ವಿರೋಧದ ನಡುವೆಯೂ ನವೀನ್ ಎಂಬಾತನನ್ನ ಪ್ರೀತಿಸಿ ಮದುವೆಯಾಗಿದ್ದಳು. ಇಬ್ಬರು ಬೇರೆ ಬೇರೆ ಜಾತಿಯವರಾಗಿದ್ದರೂ ರಿಜಿಸ್ಟರ್ ಮ್ಯಾರೇಜ್ ಆಗಿದ್ದರು.
ಹಲವು ಬಾರಿ ವರದಕ್ಷಿಣೆಗಾಗಿ ಬಿಂದುಗೆ ನವೀನ್ ಹಾಗೂ ಆತನ ತಾಯಿ ನಾಗಮ್ಮ, ಸಹೋದರಿಯರಾದ ನಯನ, ನವ್ಯ ಕಿರುಕುಳ ನೀಡ್ತಿದ್ದರು ಎನ್ನಲಾಗಿದೆ. ಹಣ ನೀಡದಿದ್ದರೇ ನಿನ್ನ ತಂದೆಯವರ ಮನೆಯಲ್ಲೇ ಇರು ಎಂದು ಕಿರುಕುಳ ನೀಡ್ತಿದ್ದನಂತೆ. ಹಣ ತರದಿದ್ದರೆ ಮಮತಾಳನ್ನ ಮದುವೆಯಾಗುವುದಾಗಿ ನವೀನ್ ಬೆದರಿಸ್ತಿದ್ದನಂತೆ ಎಂದು ಬಿಂದು ಪೋಷಕರು ಆರೋಪಿಸಿದ್ದಾರೆ.
ಡೆಟ್ನೋಟ್ನಲ್ಲಿ, ತನ್ನ ಪತಿ ಬೇರೆ ಮಹಿಳೆಯೊಂದಿಗೆ ಅಕ್ರಮ ಸಂಬಂಧದಲ್ಲಿದ್ದು, ಅತ್ತೆ ಮಾವ ಸೇರಿ ಮನೆಯವರು ವರದಕ್ಷಿಣೆಗಾಗಿ ಕಿರುಕುಳ ನೀಡುತ್ತಿದ್ದಾರೆ ಎಂದು ಬರೆದಿದ್ದಾರೆ ಎನ್ನಲಾಗಿದೆ .