ಬಿಗ್ ಬಾಸ್ ಬಗ್ಗೆ ಬಿಗ್ ಅಪ್ಡೇಟ್: ಸ್ಪರ್ಧಿಗಳ ಸೂಟ್‌ಕೇಸ್ ಪ್ಯಾಕ್ ಆಗಿದೆ..! | Filmz news
1125
: ಕನ್ನಡ ಕಿರುತೆರೆಯ ಅತಿ ದೊಡ್ಡ ರಿಯಾಲಿಟಿ ಶೋ "ಬಿಗ್ ಬಾಸ್ ಕನ್ನಡ 8" ಕಾರ್ಯಕ್ರಮ ಕೋವಿಡ್ ಎರಡನೇ ಅಲೆಯನ್ನು ನಿಯಂತ್ರಿಸುವ ಸಲುವಾಗಿ ಹೇರಲಾಗಿದ್ದ ಲಾಕ್‌ಡೌನ್‌ನಿಂದ ಅರ್ಧಕ್ಕೆ ನಿಂತು ಹೋಗಿತ್ತು. ಇದೀಗ ಮತ್ತೆ ಖಾಸಗಿ ವಾಹಿನಿಯಲ್ಲಿ ಪ್ರಸಾರವಾಗಿದೆ ಎಂಬ ಸುದ್ದಿ ಹರಿದಾಡುತ್ತಿದೆ.
ಕನ್ನಡ ವಾಹಿನಿಯ ಸಾಮಾಜಿಕ ಜಾಲತಾಣಗಳಲ್ಲಿ ಇಂದು (ಜೂನ್ 16) ಬೆಳ್ಳಂಬೆಳಗ್ಗೆ ಹಂಚಿಕೊಳ್ಳಲಾಗಿರುವ ಫೋಟೋ ಒಂದು ಬಿಗ್ಬಾಸ್ ಮುಂದುವರೆಯಲಿದೆ ಎಂಬುದಕ್ಕೆ ಪುಷ್ಟಿ ನೀಡಿದ್ದು, ವೀಕ್ಷಕರು ಸಂತಸ ವ್ಯಕ್ತಪಡಿಸಿದ್ದಾರೆ.
ಮೇ 9 ರಂದು "ಬಿಗ್ ಬಾಸ್" ಮನೆಯೊಳಗಿದ್ದ ಸ್ಪರ್ಧಿಗಳೆಲ್ಲಾ ಆಚೆ ಬಂದಿದ್ದರು. ವೈಷ್ಣವಿ ಗೌಡ, ಮಂಜು ಪಾವಗಡ, ಅರವಿಂದ್.ಕೆ.ಪಿ, ಶಮಂತ್, ಶುಭಾ ಪೂಂಜಾ, ರಘು, ನಿಧಿ ಸುಬ್ಬಯ್ಯ, ಪ್ರಶಾಂತ್ ಸಂಬರಗಿ, ದಿವ್ಯಾ ಸುರೇಶ್, ಚಕ್ರವರ್ತಿ ಚಂದ್ರಚೂಡ್ ಹಾಗೂ ಪ್ರಿಯಾಂಕಾ ತಿಮ್ಮೇಶ್ ಕಣ್ಣೀರು ಹಾಕುತ್ತಾ ಬಿಗ್ ಬಾಸ್ ಮನೆಯಿಂದ ಹೊರಗಡೆ ಬಂದಿದ್ದರು.
ಕೊರೊನಾ ನಿಯಮಗಳ ಕಾರಣಕ್ಕೆ ಬಿಗ್ಬಾಸ್ 8 ನೇ ಆವೃತ್ತಿ 72 ದಿನಗಳಿಗೆ ಅರ್ಧದಲ್ಲೇ ನಿಂತು ಹೋಗಿತ್ತು. 12 ಮಂದಿ ಸ್ಪರ್ಧಿಗಳನ್ನು ಬಿಗ್ಬಾಸ್ ಮನೆಯಿಂದ ಆಚೆ ಕರೆತರಲಾಗಿತ್ತು. ಆದರೆ ವಿನ್ನರ್ ಯಾರು ಎಂದು ಬಿಗ್ಬಾಸ್ ಹೇಳಿರಲಿಲ್ಲ. ಈಗ ಪೂರ್ತಿ ನೂರು ದಿನಗಳನ್ನು ಪೂರೈಸುವ ಯೋಜನೆ ವಾಹಿನಿಯದ್ದಾಗಿದೆ. ಹೀಗಾಗಿ ಈಗ ಮತ್ತೆ 28 ದಿನಗಳ ಕಾಲ ಮತ್ತೆ ಶೋ ಪ್ರಸಾರ ನಡೆಸಲು ಸಿದ್ಧತೆ ನಡೆಯುತ್ತಿದೆ.
ಕೆಲವೇ ನಿಮಿಷಗಳ ಹಿಂದೆ ಅಪ್ಡೇಟ್ ಆಗಿರುವ ಕಲರ್ಸ್ ಕನ್ನಡ ವಾಹಿನಿಯ ಅಫೀಶಿಯಲ್ ಫೇಸ್‌ಬುಕ್‌ ಪೇಜ್‌ನ ಕವರ್ ಫೋಟೋದಲ್ಲಿ ಹನ್ನೆರಡು ಸೂಟ್‌ಕೇಸ್‌ಗಳು ರೆಡಿ ಆಗಿವೆ. ಅಂದ್ಮೇಲೆ, "ಬಿಗ್ ಬಾಸ್ ಕನ್ನಡ 8" ಕಾರ್ಯಕ್ರಮ ಮರಳಿ ಶುರುವಾಗುತ್ತಿದ್ದು, ಬಿಗ್ ಬಾಸ್ ಮನೆಯೊಳಗೆ ಕಾಲಿಡಲು 12 ಸ್ಪರ್ಧಿಗಳ ಸೂಟ್‌ಕೇಸ್‌ಗಳು ಪ್ಯಾಕ್ ಆಗಿವೆ ಅಂತ್ಲೇ ತಾನೆ ಅರ್ಥ.?
ಬಿಗ್ ಬಾಸ್ ಕನ್ನಡ 8 ಕಾರ್ಯಕ್ರಮ ಇದೇ ತಿಂಗಳು ಪುನಃ ಆರಂಭವಾಗಲಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಆದರೆ, ಈ ಬಗ್ಗೆ ಕಲರ್ಸ್ ಕನ್ನಡ ವಾಹಿನಿ ಇನ್ನೂ ಅಧಿಕೃತ ಘೋಷಣೆ ಮಾಡಿಲ್ಲ. ಬಿಗ್ಬಾಸ್ ಮತ್ತೆ ಪ್ರಾರಂಭವಾಗುತ್ತಾ ಎಂದು ಎದುರು ನೋಡುತ್ತಿರುವ ಅಭಿಮಾನಿಗಳಿಗೆ ಬಿಗ್ಬಾಸ್ ಮತ್ತೆ ಪ್ರಾರಂಭವಾಗುತ್ತದೆ ಎನ್ನುವ ಸುದ್ದಿ ಸಖತ್ ಖುಷಿಯನ್ನು ತಂದಿದೆ.
