ಜಲಾಂತರ್ಗಾಮಿ ವಿರೋಧಿ ಸ್ಟೀಲ್ತ್ ಯುದ್ಧ ನೌಕೆ ಐಎನ್ಎಸ್ ಕವರಟ್ಟಿ ರಾಷ್ಟ್ರಕ್ಕೆ ಸಮರ್ಪಣೆ | Janata news
ವಿಶಾಖಪಟ್ಟಣ : ಸಂಪೂರ್ಣ ಸ್ವದೇಶಿ ನಿರ್ಮಿತ ಜಲಾಂತರ್ಗಾಮಿ ವಿರೋಧಿ ಸ್ಟೀಲ್ತ್ ಯುದ್ಧ ನೌಕೆಗಳ ಸರಣಿಯಲ್ಲಿ ಕೊನೆಯ ಹಾಗೂ ನಾಲ್ಕನೇ ನೌಕೆಯಾದ ಐಎನ್ಎಸ್ ಕವರಟ್ಟಿ ಯನ್ನು ಇಂದು ಗುರುವಾರ ಭಾರತೀಯ ನೌಕಾಪಡೆಗೆ ಅಧಿಕೃತವಾಗಿ ನಿಯೋಜಿಸಲಾಗಿದೆ. ಪ್ರಾಜೆಕ್ಟ್ 28(ಕಮೋರ್ಟಾ ಕ್ಲಾಸ್) ಅಡಿಯಲ್ಲಿ ಸ್ವದೇಶಿ ನಿರ್ಮಿತ ಕೊನೆಯ ಹಾಗೂ 4ನೇ ಜಲಾಂತರ್ಗಾಮಿ ವಿರೋಧಿ ಯುದ್ಧ(ಎಎಸ್ಡಬ್ಲ್ಯೂ) ಸ್ಟೆಲ್ತ್ ಕಾರ್ವೆಟ್ ಐಎನ್ಎಸ್ ಕವರಟ್ಟಿ ಇಂದು ಔಪಚಾರಿಕವಾಗಿ ಭಾರತೀಯ ನೌಕಾಪಡೆಗೆ ನಿಯೋಜನೆಗೊಂಡಿದೆ.
ದೇಶದ ರಕ್ಷಣಾ ಕ್ಷೇತ್ರದ ಸಕ್ಷಮತೆ ಗಣನೀಯವಾಗಿ ಹೆಚ್ಚಿಸುತ್ತಿರುವ ಜೊತೆಗೆ, ಆತ್ಮನಿರ್ಭರ ಭಾರತ, ಮೇಕ್ ಇನ್ ಇಂಡಿಯಾಗೆ ಇತ್ತೀಚೆಗೆ ಹೆಚ್ಚಿನ ಪ್ರಾಶಸ್ತ್ಯ ಕೊಡಲಾಗುತ್ತಿರುವುದು ಗಮನಾರ್ಹವಾಗಿದೆ.
ಇಂದು ಬೆಳಗ್ಗೆ ಭಾರತೀಯ ಭೂಸೇನೆ ಮುಖ್ಯಸ್ಥ ಜನರಲ್ ಮನೋಜ್ ಮುಕುಂದ್ ನರವಣೆ ವಿಶಾಖಪಟ್ನಂನ ನೌಕಾನೆಲೆಯಲ್ಲಿ ಭಾರತೀಯ ನೌಕಾಪಡೆಗೆ ನಿಯೋಜಿಸಿ ಮಾತನಾಡಿದರು. ಐಎನ್ಎಸ್ ಕವರಟ್ಟಿ ಕಾರ್ಯಾರಂಭವು ನಮ್ಮ ದೇಶದ ಕಡಲ ಗುರಿಗಳನ್ನು ಭದ್ರಪಡಿಸುವ ಮತ್ತೊಂದು ಮಹತ್ವದ ಹೆಜ್ಜೆಯಾಗಿದೆ. ಕವರಟ್ಟಿ ತಂಡಕ್ಕೆ ನನ್ನ ಅಭಿನಂದನೆಗಳು ಮತ್ತು ಶುಭಾಶಯಗಳು, ಎಂದು ಜನರಲ್ ನರವಣೆ ಶುಭಕೋರಿದ್ದಾರೆ.
ಪ್ರಬಲ ಜಲಾಂತರ್ಗಾಮಿ ವಿರೋಧಿ ಯುದ್ಧ ಯುದ್ಧನೌಕೆ ಐಎನ್ಎಸ್ ಕವರಟ್ಟಿಯನ್ನು ಭಾರತೀಯ ನೌಕಾಪಡೆಯ ವಿನ್ಯಾಸ ನಿರ್ದೇಶನಾಲಯವು ವಿನ್ಯಾಸಗೊಳಿಸಿದ್ದು, ಇದನ್ನು ಗಾರ್ಡನ್ ರೀಚ್ ಶಿಪ್ಬಿಲ್ಡರ್ಸ್ ಮತ್ತು ಎಂಜಿನಿಯರ್ಸ್ ಕೋಲ್ಕತಾ ಶಾಖೆಯಲ್ಲಿ ನಿರ್ಮಿಸಲಾಗಿದೆ. ಹಡಗಿನ ನಿರ್ಮಾಣದಲ್ಲಿ ಶೇಕಡಾ 90% ಗಳಷ್ಟು ಸ್ವದೇಶಿ ಸಾಮಗ್ರಿಗಳನ್ನು ಬಳಸಲಾಗಿದೆ.
ಕವರಟ್ಟಿ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಮತ್ತು ಜಲಾಂತರ್ಗಾಮಿ ನೌಕೆಗಳನ್ನು ಪತ್ತೆ ಹಚ್ಚುವ ಮತ್ತು ಸಂಶೋಧನೆಗೆ ಒಳಪಡಿಸುವ ಸಂವೇದಕವನ್ನು ಹೊಂದಿದೆ. ಜಲಾಂತರ್ಗಾಮಿ ವಿರೋಧಿ ಯುದ್ಧ ಸಾಮರ್ಥ್ಯದ ಜೊತೆಗೆ, ಹಡಗು ವಿಶ್ವಾಸಾರ್ಹ ಸ್ವರಕ್ಷಣೆ ಸಾಮರ್ಥ್ಯ ಮತ್ತು ದೀರ್ಘ-ಶ್ರೇಣಿಯ ನಿಯೋಜನೆಗಳಿಗೆ ಉತ್ತಮ ಕಾರ್ಯಕ್ಷಮತೆಯನ್ನು ಹೊಂದಿದೆ.