ಚೀನಾ ವಿರುದ್ಧ, ಟಿಬೆಟ್ ಬೆಂಬಲಿಸಿ ಐತಿಹಾಸಿಕ ಕಾನೂನು ಅಂಗಿಕರಿಸಿದ ಅಮೇರಿಕ ಸಂಸತ್ತು | Janata news
ವಾಷಿಂಗ್ಟನ್ : ಭಾರತದೊಂದಿಗೆ ಚೀನಾದ ಎಲ್ಎಸಿ(ಟಿಬೆಟ್ ಗಡಿ) ಉದ್ದಕ್ಕೂ ನಡೆಯುತ್ತಿರುವ ಮುಖಾಮುಖಿಯ ಮಧ್ಯೆ, ಟಿಬೆಟ್ನಲ್ಲಿ ದಲೈ ಲಾಮಾ ಅವರನ್ನು ಆಯ್ಕೆ ಮಾಡುವ ಪ್ರಕ್ರಿಯೆಯಲ್ಲಿ ಚೀನಾ ಸರ್ಕಾರದ ಹಸ್ತಕ್ಷೇಪವನ್ನು ಅಮೆರಿಕ(ಯುಎಸ್) ಬಲವಾಗಿ ವಿರೋಧಿಸಿದೆ.
ಟಿಬೆಟ್ನಲ್ಲಿ ಧಾರ್ಮಿಕ ಸ್ವಾತಂತ್ರ್ಯವನ್ನು ಬೆಂಬಲ ವ್ಯಕ್ತಪಡಿಸುತ್ತ ಯುಎಸ್ ಸಂಸತ್ತು ಹೊಸ ಕಾನೂನನ್ನು ಅಂಗೀಕರಿಸಿದೆ. ಭಾರತ, ನೇಪಾಳ, ಭೂತಾನ್ ಮತ್ತು ಮಂಗೋಲಿಯಾದಂತಹ ದೇಶಗಳಲ್ಲಿಯೂ ಬೌದ್ಧಧರ್ಮವನ್ನು ಆಚರಿಸಿದಾಗ, ಚೀನಾದ ಕಮ್ಯುನಿಸ್ಟ್ ಸರ್ಕಾರವು ಮಾತ್ರ, ಧಾರ್ಮಿಕ ಗುರುವನ್ನು(ದಲೈ ಲಾಮಾ) ಆರಿಸುವಲ್ಲಿ ಏಕೆ ಅಡ್ಡಿಪಡಿಸುತ್ತಿದೆ, ಎಂದು ಹೊಸ ಕಾನೂನು ಸ್ಪಷ್ಟವಾಗಿ ಹೇಳುತ್ತದೆ.
ಸೋಮವಾರ ರಾತ್ರಿ, ಅಮೇರಿಕ ಸಂಸತ್ತು ಟಿಬೆಟ್ ನೀತಿ ಮತ್ತು ಬೆಂಬಲ ಕಾಯ್ದೆಯನ್ನು ಅಂಗೀಕರಿಸಿತು. ಮಸೂದೆಯು ಟಿಬೆಟ್ನಲ್ಲಿ ಧಾರ್ಮಿಕ-ಸ್ವಾತಂತ್ರ್ಯಯನ್ನು ಬೆಂಬಲಿಸುತ್ತದೆ ಮತ್ತು ಪ್ರಜಾಪ್ರಭುತ್ವವನ್ನು ಬಲಪಡಿಸುವ, ಪರಿಸರ ಸಂರಕ್ಷಣೆ, ಧಾರ್ಮಿಕ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಉಳಿಸುವ ಕುರಿತು ಬೆಂಬಲಿಸಲಾಗಿದೆ.
ಅಮೇರಿಕಾದ ಹೊಸ ಕಾನೂನು ದಲೈ-ಲಾಮಾ ಬೆಂಬಲಿತ ಪ್ರಜಾಪ್ರಭುತ್ವ ಸರ್ಕಾರವನ್ನು ಸಂಪೂರ್ಣವಾಗಿ ಅನುಮೋದಿಸಿದ್ದು, ಟಿಬೆಟ್ಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಚರ್ಚಿಸಲು ಚೀನಾ ಸರ್ಕಾರವನ್ನು ಕೋರಲಾಗಿದೆ. ಇದನ್ನು ಮಾಡದಿದ್ದರೆ, ಚೀನಾ ಮೇಲೆ ನಿರ್ಬಂಧ ಹೇರಲು ಹೊಸ ಕಾನೂನಿನಲ್ಲಿ ಹೇಳಲಾಗಿದೆ.
ಮಂಗಳವಾರ ದೇಶದಿಂದ ಹೊರಹಾಕಲ್ಪಟ್ಟಿರುವ ಟಿಬೆಟಿಯನ್ನರ ರಾಜಕೀಯ ಮುಖ್ಯಸ್ಥರು, ಚೀನಾ ವಿರುದ್ಧದ, ಯು.ಎಸ್. ಅಂಗೀಕರಿಸಿದ ಶಾಸನವನ್ನು ಸ್ವಾಗತಿಸಿದರು, ಇದು ತಮ್ಮ ಆಧ್ಯಾತ್ಮಿಕ ನಾಯಕ ದಲೈ ಲಾಮಾ ಅವರ ಉತ್ತರಾಧಿಕಾರಿಯನ್ನು ಆಯ್ಕೆ ಮಾಡಲು ಟಿಬೆಟಿಯನ್ನರ ಹಕ್ಕುಗಳನ್ನು ಪುನರುಚ್ಚರಿಸುತ್ತದೆ, ಎಂದು ಹರ್ಷ ವ್ಯಕ್ತ ಪಡಿಸಿದ್ದಾರೆ.
ಚೀನಾ ಕಮ್ಯುನಿಸ್ಟ್ ಸರ್ಕಾರ, ದಲೈ ಲಾಮಾ ಅವರನ್ನು ಅಪಾಯಕಾರಿ ಪ್ರತ್ಯೇಕತಾವಾದಿ ಎಂದು ಪರಿಗಣಿಸುತ್ತಿದ್ದು, ಟಿಬೆಟ್ ಕುರಿತಾದ ಯು.ಎಸ್. ಸಂಸತ್ತಿನ ಈ ಬೆಂಬಲವು, ಅಮೇರಿಕ-ಚೀನಾ ದೇಶಗಳ ನಡುವೆ ಈಗಾಗಲೇ ಉದ್ವಿಗ್ನ ಸಂಬಂಧವನ್ನು ಹೆಚ್ಚಿಸಬಹುದಾಗಿದೆ.