ಲಸಿಕೆ ಯಾರು ಪಡೆಯಬಹುದು, ಯಾರು ಪಡೆಯುವಂತಿಲ್ಲ? ಆರೋಗ್ಯ ಇಲಾಖೆ ಮಾರ್ಗಸೂಚಿ | Janata news
ನವದೆಹಲಿ: : ನಾಳೆ ಪ್ರಧಾನಿ ನರೇಂದ್ರ ಮೋದಿಯವರು ಕೊರೋನಾ ಲಸಿಕಾ ವಿತರಣೆಗೆ ಚಾಲನೆ ನೀಡಲಿದ್ದಾರೆ. ಪ್ರಧಾನಿಯ ಚಾಲನೆಯ ನಂತರ ದೇಶ ಸೇರಿದಂತೆ ರಾಜ್ಯದಲ್ಲೂ ಕೊರೋನಾ ಲಸಿಕೆ ವಿತರಣೆ ಆರಂಭಗೊಳ್ಳಲಿದೆ. ಬೆಂಗಳೂರು ಸೇರಿದಂತೆ ರಾಜ್ಯಾಧ್ಯಂತ ನಾಳೆ ಮೊದಲ ಹಂತದ ಲಸಿಕಾ ವಿತರಣೆ ಎಷ್ಟು ಕೇಂದ್ರಗಳಲ್ಲಿ ನಡೆಯಲಿದೆ.
ಇದಕ್ಕೆ ಸಂಬಂಧಿಸಿದಂತೆ ಹೇಳಿಕೆ ಬಿಡುಗಡೆ ಮಾಡಿರುವ ಪ್ರಧಾನಿ ಕಾರ್ಯಾಲಯ, ಪಿಎಂ ನರೇಂದ್ರ ಮೋದಿ ಅವರು ಜನವರಿ 16 ರಂದು ಬೆಳಗ್ಗೆ 10.30 ಕ್ಕೆ ವಿಡಿಯೋ ಕಾನ್ಫರೆನ್ಸಿಂಗ್ ಮೂಲಕ ರಾಷ್ಟ್ರವ್ಯಾಪಿ ಕೋವಿಡ್ -19 ವ್ಯಾಕ್ಸಿನೇಷನ್ ಅಭಿಯಾನವನ್ನು ಪ್ರಾರಂಭಿಸಲಿದ್ದಾರೆ. ಇದು ವಿಶ್ವದ ಅತಿದೊಡ್ಡ ವ್ಯಾಕ್ಸಿನೇಷನ್ ಅಭಿಯಾನವಾಗಿರಲಿದೆ ಎಂದು ಕಾರ್ಯಾಲಯ ಹೇಳಿದೆ.
ಇದಕ್ಕೆ ಸಂಬಂಧಪಟ್ಟಂತೆ ಹೇಳಿಕೆ ನೀಡಿರುವ ಕೇಂದ್ರ ಆರೋಗ್ಯ ಸಚಿವಾಲಯ, ಮಕ್ಕಳು, ಗರ್ಭಿಣಿ ಮತ್ತು ಹಾಲುಣಿಸುವ ಮಹಿಳೆಯರಿಗೆ ಕೊವಿಡ್ -19 ಲಸಿಕೆಗಳನ್ನು ನೀಡಬೇಡಿ, ಏಕೆಂದರೆ ಅವರ ಮೇಲೆ ಕರೋನಾ ಲಸಿಕೆಯ ಯಾವುದೇ ಪ್ರಾಯೋಗಿಕ ಪರೀಕ್ಷೆಗಳು ನಡೆದಿಲ್ಲ ಎಂದು ಸ್ಪಷ್ಟಪಡಿಸಿದೆ.
ಈಗಾಗಲೇ ಸಾಕಷ್ಟು ಪ್ರಮಾಣದ ಲಸಿಕೆಗಳನ್ನು ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ರವಾನಿಸಲಾಗಿದೆ. ಲಸಿಕೆ ಹಂಚಿಕೆ ಹಿನ್ನೆಲೆಯಲ್ಲಿ ಕೇಂದ್ರ ಆರೋಗ್ಯ ಇಲಾಖೆ ಮಾರ್ಗಸೂಚಿ ಹೊರಡಿಸಿದೆ.
- ಗರ್ಭಿಣಿ, ಬಾಣಂತಿಯರಿಗೆ ಕೊರೊನಾ ಲಸಿಕೆ ನೀಡುವಂತಿಲ್ಲ
- ಮೊದಲ ಡೋಸ್ ಪಡೆದವರಿಗೆ 2ನೇ ಡೋಸ್ ಕಡ್ಡಾಯ
- 28 ದಿನಗಳ ಅಂತರದಲ್ಲಿ 2 ನೇ ಡೋಸ್ ಪಡೆಯಬೇಕು
- ಹೈಬಿಪಿ, ಉಸಿರಾಟ ಸಮಸ್ಯೆ ಇರೋರ ಮೇಲೆ ತೀವ್ರ ನಿಗಾ
- 18 ವರ್ಷ ಮೇಲ್ಪಟ್ಟವರಿಗೆ ಮಾತ್ರ ಕೊರೊನಾ ವ್ಯಾಕ್ಸಿನ್
- ಲಸಿಕೆ ವಿತರಣೆಯ ತಂಡದಲ್ಲಿ ಕನಿಷ್ಠ 5 ಮಂದಿಯಾದರೂ ಇರಲೇಬೇಕು
- ಲಸಿಕೆ ನೀಡುವ ಸ್ಥಳ ವಿಶಾಲವಾಗಿರಬೇಕು, ಜೊತೆಗೆ ವೇಟಿಂಗ್ ರೂಮ್ ಹೊಂದಿರಬೇಕು
- ಓರ್ವ ವ್ಯಕ್ತಿಗೆ ಕೊರೊನಾ ಗುಣಲಕ್ಷಣಗಳಿದ್ದರೆ, ಅಂತವರಿಗೆ 4-8 ವಾರಗಳ ಚೇತರಿಕೆಯ ಬಳಿಕ ನೀಡಬೇಕು
- ಲಸಿಕೆಯ ವಿನಿಮಯಕ್ಕೆ ಅವಕಾಶವಿಲ್ಲ ಎಂದು ಕೇಂದ್ರ ಸರ್ಕಾರ ಹೇಳಿದೆ
- ಲಸಿಕೆಯ ಎರಡನೇ ಡೋಸ್ ಸಹ ಮೊದಲ ಡೋಸ್ನಂತೆಯೇ ಇರಬೇಕು
- ಪ್ರತಿ ಸೆಸನ್ನಲ್ಲಿ ಅಂದ್ರೆ ಒಂದು ದಿನಕ್ಕೆ ಕೇವಲ 100 ರಿಂದ 200 ಮಂದಿಗೆ ಮಾತ್ರ ಲಸಿಕೆ ನೀಡಬೇಕು
- ಲಸಿಕೆ ಹಾಕಿದ ಮೇಲೆ ಪ್ರತಿ ವ್ಯಕ್ತಿಯ ಮೇಲೆ 30 ನಿಮಿಷಗಳ ಕಾಲ ನಿಗಾ ಇಡಬೇಕು
- ಜೊತೆಗೆ ಅಬ್ಸರ್ವೇಷನ್ ಕೋಣೆ ಕೂಡ ಇರಬೇಕು, ಜೊತೆಗೆ ಜನಸಂದಣಿಯನ್ನ ತಡೆಯುವುದಕ್ಕಾಗಿಯೇ ಸಿಬ್ಬಂದಿ ನೇಮಕ ಆಗಿರಬೇಕು
- ಕೊವಿಡ್ ವ್ಯಾಕ್ಸಿನ್ ಇಂಟಲಿಜೆನ್ಸ್ ನೆಟ್ವರ್ಕ್ (Co-WIN) ಸಿಸ್ಟಮ್ನಲ್ಲಿ ವಿತರಣೆ -ಡಿಜಿಟಲ್ ಪ್ಲಾಟ್ಫಾರ್ಮ್ನಲ್ಲಿ ನೀಡಲಾಗುತ್ತದೆ
- ವೋಟರ್ ಐಡಿ, ಆಧಾರ್ ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್, ಪಾಸ್ಪೋರ್ಟ್, ಪೆನ್ಷನ್ ಡಾಕ್ಯುಮೆಂಟ್ಸ್ ಸೇರಿದಂತೆ ವಿವಿಧ ಗುರುತಿನ ಚೀಟಿಗಳು ಲಸಿಕೆ ವಿತರಣೆ ವೇಳೆ ಕಡ್ಡಾಯ
ಯಾವ ಜಿಲ್ಲೆಗಳಲ್ಲಿ, ಎಲ್ಲೆಲ್ಲಿ, ಕೊರೊನಾ ಲಸಿಕೆಯನ್ನ ವಿತರಣೆ ಮಾಡಬೇಕು ಅನ್ನೋದನ್ನ ಆಯಾ ರಾಜ್ಯಗಳೇ ನಿರ್ಧರಿಸಬೇಕು ಸೇರಿದಂತೆ ಹಲವು ಮಾರ್ಗಸೂಚಿಗಳನ್ನ ಕೇಂದ್ರ ಸರ್ಕಾರ ಪ್ರಕಟ ಮಾಡಿದೆ.
ಬೆಂಗಳೂರಿನ 6 ಕೇಂದ್ರದಲ್ಲಿ ನಾಳೆ ಮೊದಲ ಹಂತದ ಕೊರೊನಾ ಲಸಿಕೆ ವಿತರಣೆ ಮಾಡಲಿದ್ದು, ವಿಕ್ಟೋರಿಯಾ ಆಸ್ಪತ್ರೆಯ ಬಿಎಂಸಿಆರ್ಐ, ಕೋರಮಂಗಲದ ಅಕಾಡೆಮಿ ಆಫ್ ಹೆಲ್ತ್ ಸೈನ್ಸ್, ಸೆಂಟ್ ಜಾನ್ಸ್ ನ್ಯಾಷನಲ್ ಅಕಾಡೆಮಿ ಆಫ್ ಹೆಲ್ತ್ಸೈನ್ಸ್, ಮಲ್ಲೇಶ್ವರಂನ ಕೆಸಿಜಿ ಆಸ್ಪತ್ರೆ, ಇಂದ್ರಾನಗರದ ಸಿ.ವಿ.ರಾಮನ್ ಆಸ್ಪತ್ರೆ, ಜಯನಗರದ ಆಸ್ಪತ್ರೆ, ಮಲ್ಲಸಂಧ್ರ ಯುಪಿಹೆಚ್ಸಿನಲ್ಲಿ ಕೊರೊನಾ ಲಸಿಕೆ ನೀಡಲಾಗುತ್ತದೆ.