ಹಳೆಯ ವಾಹನ ಸ್ಕ್ರ್ಯಾಪೇಜ್ ನೀತಿಯನ್ನು ಪ್ರಕಟಿಸಿದ ಕೇಂದ್ರ ಸಚಿವ ನಿತಿನ್ ಗಡ್ಕರಿ : ನೀತಿಯ ವಿವರ | Janata news
ನವದೆಹಲಿ : ಲೋಕಸಭೆಯಲ್ಲಿ ಬಹುನಿರೀಕ್ಷಿತ ವಾಹನ ಸ್ಕ್ರ್ಯಾಪೇಜ್ ನೀತಿಯನ್ನು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅವರು ಇಂದು ಗುರುವಾರ ಲೋಕಸಭೆಯಲ್ಲಿ ಪ್ರಕಟಿಸಿದ್ದಾರೆ. ಹಳೆಯ ಮತ್ತು ದೋಷಯುಕ್ತ ವಾಹನಗಳ ಸಂಖ್ಯೆಯನ್ನು ಕಡಿಮೆ ಮಾಡುವುದು, ವಾಯು ಮಾಲಿನ್ಯಕಾರಕ ವಾಹನಗಳನ್ನು ಕಡಿಮೆಗೊಳಿಸುವುದು, ರಸ್ತೆ ಮತ್ತು ವಾಹನ ಸುರಕ್ಷತೆಯನ್ನು ಸುಧಾರಿಸುವ ಉದ್ದೇಶವನ್ನು ಈ ನೀತಿ ಹೊಂದಿದೆ, ಎಂದು ಗಡ್ಕರಿ ಹೇಳಿದರು.
ವಾಹನಗಳನ್ನು ಗುಜರಿಗೆ ಹಾಕುವ ನೀತಿಗೆ ಸಂಬಂಧಿಸಿದಂತೆ ಲೋಕಸಭೆಯಲ್ಲಿ ಉತ್ತರಿಸಿದ ಅವರು, ಹಳೆಯ ವಾಹನಗಳನ್ನು ಸ್ಕ್ರ್ಯಾಪ್ ಮಾಡುವ ಇದು ಎಲ್ಲರಿಗೂ ಲಾಭದಾಯಕ ನೀತಿಯಾಗಿದೆ, ಎಂದು ಸಾರಿಗೆ ಸಚಿವರು ಹೇಳಿದರು, ಮರುಬಳಕೆ ಮಾಡುವುದರಿಂದ ವಾಹನ ಉದ್ಯಮಕ್ಕೆ ಸಾಮಗ್ರಿಗಳ ವೆಚ್ಚ ಕಡಿಮೆಯಾಗುತ್ತದೆ, ಎಂದಿದ್ದಾರೆ.
ರದ್ದುಗೊಳಿಸಿದ ವಾಹನಗಳ ಬದಲಿಗೆ ಹೊಸ ವಾಹನಗಳನ್ನು ಖರೀದಿಸಲು ರಾಜ್ಯಗಳು ನೋಂದಣಿ ಮತ್ತು ರಸ್ತೆ ತೆರಿಗೆಗಳಲ್ಲಿ ರಿಯಾಯಿತಿ ನೀಡಬಹುದು, ಎಂದು ಅವರು ಹೇಳಿದರು.
ಫಿಟ್ನೆಸ್ ಪರೀಕ್ಷೆಯಲ್ಲಿ ವಿಫಲವಾದ ಅಥವಾ ಅದರ ನೋಂದಣಿ ಪ್ರಮಾಣಪತ್ರವನ್ನು ನವೀಕರಿಸಲು ವಿಫಲವಾದ ವಾಹನವನ್ನು, ಎಂಡ್ ಆಫ್ ಲೈಫ್ ವೆಹಿಕಲ್, ಎಂದು ಘೋಷಿಸಬಹುದಾಗಿ ತಿಳಿಸಿದ್ದಾರೆ.
ವಾಹನಗಳನ್ನು ಗುಜರಿಗೆ ಹಾಕುವ ನೀತಿಯಿಂದ ಲಾಭವೇ ಹೆಚ್ಚು. ಈ ನೀತಿಯು ಇಂಧನ ಕ್ಷಮತೆಯನ್ನು ಹೆಚ್ಚಿಸುವ ಜೊತೆಗೆ ಪರಿಸರ ಮಾಲಿನ್ಯವನ್ನು ತಡೆಗಟ್ಟಲು ನೆರವಾಗುತ್ತದೆ, ಎಂದು ಸಚಿವರು ಹೇಳಿದರು.
ಹಳೆಯ ವಾಹನವನ್ನು ಸ್ಕ್ರ್ಯಾಪ್ ಮಾಡಿದ್ದಲ್ಲಿ ವಾಹನ ಮಾಲೀಕರು ಹೆಚ್ಚಿನ ಲಾಭವನ್ನು ಪಡೆಯಬಹುದು.
- ಸ್ಕ್ರ್ಯಾಪಿಂಗ್ ಕೇಂದ್ರದಿಂದ ಗ್ರಾಹಕರು ಹಳೆಯ ವಾಹನಕ್ಕೆ ಸ್ಕ್ರ್ಯಾಪ್ ಮೌಲ್ಯವನ್ನು ಪಡೆಯುತ್ತಾರೆ, ಇದು ಆ ವಾಹನದ ಎಕ್ಸ್ ಶೋರೂಂ ಬೆಲೆಯ ಸರಿಸುಮಾರು ಶೇಕಡಾ 4-6ರಷ್ಟು ಇರಲಿದೆ.
- ವೈಯಕ್ತಿಕ ವಾಹನಗಳಿಗೆ ಶೇ25 ರಷ್ಟು ಮತ್ತು ವಾಣಿಜ್ಯ ವಾಹನಗಳಿಗೆ ಶೇ15 ರವರೆಗೆ ರಸ್ತೆ ತೆರಿಗೆ ರಿಯಾಯಿತಿ ನೀಡುವಂತೆ ರಾಜ್ಯ ಸರ್ಕಾರಗಳಿಗೆ ಸೂಚಿಸಬಹುದು.
- ಸ್ಕ್ರ್ಯಾಪಿಂಗ್ ಪ್ರಮಾಣಪತ್ರದ ಬದಲಿಗೆ ಹೊಸ ವಾಹನ ಖರೀದಿ ಸಂದರ್ಭದಲ್ಲಿ ಶೇ5 ರಷ್ಟು ರಿಯಾಯಿತಿ ನೀಡುವಂತೆ ವಾಹನ ತಯಾರಕರಿಗೆ ಸೂಚಿಸಲಾಗಿದೆ.
- ಹೆಚ್ಚುವರಿಯಾಗಿ, ಸ್ಕ್ರ್ಯಾಪಿಂಗ್ ಪ್ರಮಾಣಪತ್ರದ ವಿರುದ್ಧ ಹೊಸ ವಾಹನವನ್ನು ಖರೀದಿಸಲು ನೋಂದಣಿ ಶುಲ್ಕವನ್ನು ಸಹ ಮನ್ನಾ ಮಾಡಬಹುದು.
ಈ ನೀತಿ ಜಾರಿಗೆ ಬಂದ ನಂತರ ಹೊಸ ವಾಹನಗಳ ಖರೀದಿಯಲ್ಲಿ ಹೆಚ್ಚಳ ಕಂಡುಬರುವುದು. ಇದರಿಂದ ಜಿಎಸ್ಟಿ ಸಂಗ್ರಹದಿಂದಾಗುವ ಆದಾಯದಲ್ಲಿಯೂ ಹೆಚ್ಚಳವಾಗುವುದು, ಎಂದೂ ಸಚಿವ ಗಡ್ಕರಿ ಹೇಳಿದರು.