ತಂದೆಯಿಂದಲೇ ಅತ್ಯಾಚಾರ, ಗರ್ಭಿಣಿಯಾದ ಬಾಲಕಿ, ತಂದೆ ಬಂಧನ! | Janata news
ಬೆಂಗಳೂರು : ಮಗಳ ಮೇಲೆಯೇ ನಿರಂತರ ಅತ್ಯಾಚಾರ ಎಸಗಿದ ಪಾಪಿ ಮಲತಂದೆಯೋರ್ವನನ್ನು ಸಂಪಿಗೆಹಳ್ಳಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ಶಬ್ಬೀರ್ ಬಂಧಿತ ಆರೋಪಿ. ಈತ ಆಟೋ ಚಾಲಕನಾಗಿದ್ದು ಇಬ್ಬರು ಪತ್ನಿಯರಿದ್ದಾರೆ. ಈತ ತನ್ನ 15 ವರ್ಷದ ಅಪ್ರಾಪ್ತ ವಯಸ್ಸಿನ ಮಗಳ ಮೇಲೆ ನಿರಂತರ ಅತ್ಯಾಚಾರವೆಸಗಿದ್ದು, ಪಾಪಿಯ ಕೃತ್ಯಕ್ಕೆ ಬಾಲಕಿ ಈಗ ಆರು ತಿಂಗಳ ಗರ್ಭಿಣಿಯಾಗಿದ್ದಾಳೆ.
ಬಾಲಕಿಯ ತಾಯಿ ತನ್ನ ಮೊದಲ ಗಂಡನಿಗೆ ವಿಚ್ಛೇದನ ಕೊಟ್ಟು ಆರೋಪಿ ಶಬ್ಬೀರ್ನನ್ನು ವರಿಸಿದ್ದಳು. ಶಬ್ಬೀರ್ಗೂ ಇದು ಎರಡನೇ ಮದುವೆಯಾಗಿದೆ. ಈಕೆಗೆ ಮೂರು ಮಕ್ಕಳನ್ನು ಕರುಣಿಸಿರೋ ಶಬ್ಬೀರ್, ಪತ್ನಿ ಮೂರನೇ ಮಗುವಿನ ಹೆರಿಗೆಗೆ ತವರಿಗೆ ಹೋದಾಗ ಬಾಲಕಿ ಮೇಲೆ ನಿರಂತರ ಅತ್ಯಾಚಾರ ಎಸಗಿದ್ದಾನೆ.
ಈ ಮಧ್ಯೆ ತನ್ನ ಮೊದಲ ಪತ್ನಿಯ ಪುತ್ರಿ 15 ವರ್ಷದ ಬಾಲಕಿ ಒಬ್ಬಳೇ ಮನೆಯಲ್ಲಿದ್ದಳು.ಆಗ ಆರೋಪಿ ಆ ಮಗಳ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ ಎಂದು ಆರೋಪಿಸಲಾಗಿದೆ. ಆ ರೀತಿ ದೌರ್ಜನ್ಯ ಎಸಗಿದ್ದು ಮಾತ್ರವಲ್ಲದೆ ಈ ಸಂಬಂಧ ಯಾವ ವಿಚಾರವನ್ನೂ ಹೊರಗೆ ಯಾರೊಡನೆ ಹೇಳಬಾರದೆಂದು ಬಾಲಕಿಗೆ ಬೆದರಿಕೆ ಹಾಕಿದ್ದ.
ಆದರೆ ಕೆಲವು ದಿನಗಳ ಹಿಂದೆ, ಆಕೆಯನ್ನು ವೈದ್ಯಕೀಯ ಪರೀಕ್ಷೆಗೆ ಕರೆದೊಯ್ದ ವೇಳೆ ಆಕೆ ಗರ್ಭಿಣಿಯಾಗಿರುವುದು ಕಂಡುಬಂದಿದೆ. ಆಗ ಆ ಬಾಲಕಿ ತನ್ನ ತಂದೆ ತನ್ನ ಮೇಲೆ ನಡೆಸಿದ ದೌರ್ಜನ್ಯವನ್ನು ಬಹಿರಂಗಪಡಿಸಿದ್ದಾಳೆ.