ಬೆಳಗಾವಿಯಲ್ಲಿ 9 ಮಂದಿಗೆ ಕಪ್ಪು ಶಿಲೀಂಧ್ರ, 2 ವೈಟ್ ಫಂಗಸ್ ಕೇಸ್ ಪತ್ತೆ! | ಜನತಾ ನ್ಯೂಸ್
ಬೆಳಗಾವಿ : ಕೋವಿಡ್ 2ನೇ ಅಲೆ ಕಾಣಿಸಿಕೊಂಡ ನಂತರ, ಜಿಲ್ಲೆಯಲ್ಲಿ 15 ದಿನಗಳಿಂದ 9 ಮಂದಿಯಲ್ಲಿ ಕಪ್ಪು ಶಿಲೀಂಧ್ರ ಪ್ರಕರಣಗಳು ಕಂಡುಬಂದಿವೆ. ಅದರಲ್ಲಿ ಇಬ್ಬರು ಸಾವನ್ನಪ್ಪಿದ್ದಾರೆ.
ಅದೇ ರೀತಿ ಎರಡು ವೈಟ್ ಫಂಗಸ್ ಕೇಸ್ಗಳು ದೃಢಪಟ್ಟಿವೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಅಧಿಕಾರಿ ಡಾ.ಶಶಿಕಾಂತ ಮುನ್ಯಾಳ ತಿಳಿಸಿದ್ದಾರೆ.
ಬೆಳಗಾವಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕೋವಿಡ್ 2ನೇ ಅಲೆ ನಂತರ ಕಳೆದ 15 ದಿನಗಳಲ್ಲಿ ಜಿಲ್ಲೆಯಲ್ಲಿ ಬ್ಲ್ಯಾಕ್ ಫಂಗಸ್ ಕೇಸ್ಗಳು ಕಂಡು ಬರುತ್ತಿವೆ. ಈಗಾಗಲೇ ಸುಮಾರು 9 ಕೇಸ್ಗಳನ್ನು ಬೆಳಗಾವಿ ಜಿಲ್ಲೆಯಾದ್ಯಂತ ಗುರುತಿಸಿಲಾಗಿದ್ದು. ಇದರಲ್ಲಿ ಇಬ್ಬರ ವ್ಯಕಿಗಳು ಸಂಶಯಾಸ್ಪದ ರೀತಿಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಹೇಳಿದರು.
ಕೋವಿಡ್ ಉಪಚಾರದಲ್ಲಿ ಆಗುವ ಅಡ್ಡಪರಿಣಾಮದಲ್ಲಿ ಇದೂ ಒಂದಾಗಿದೆ. ಆಮ್ಲಜನಕ ಪೈಪ್ಲೈನ್ನಲ್ಲಿ ಬಳಸುವ "ಹ್ಯುಮಿಡಿಫೈರ್" ನೀರನ್ನು ಸಮರ್ಪಕವಾಗಿ ಹಾಗೂ ಉತ್ತಮ ನೀರನ್ನು ಆಮ್ಲಜನಕ ಪೆನಲ್ನಲ್ಲಿ ಬಳಸದಿರುವುದು ಇದಕ್ಕೆ ಕಾರಣವಾಗಿದೆ ಎಂದು ಹೇಳಿದರು.
ಆಮ್ಲಜನಕ ಪೈಪ್ಲೈನ್ ಅನ್ನು ಹಾಗೂ ರೋಗಿಗಳಿಗೆ ನೀಡುವ ಮಾಸ್ಕ್ಗಳನ್ನೂ 48 ಗಂಟೆಗಳ ಬಳಿಕ ಬದಲಿಸಬೇಕು. ನಿತ್ಯವೂ ಸ್ವಚ್ಛವಾದ ಮಾಸ್ಕ್ ಬಳಸಬೇಕು. ಬಟ್ಟೆ ಮಾಸ್ಕ್ ಕೂಡ ಪರಿಣಾಮಕಾರಿ. ಅದನ್ನು ನಿತ್ಯವೂ ತೊಳೆದು ಬಿಸಿಲಿನಲ್ಲಿ ಒಣಗಿಸಿ, ಇಸ್ತ್ರಿ ಮಾಡಿ ಹಾಕೊಬೇಕು. 2-3 ದಿನ ಒಂದನ್ನೇ ಬಳಸುವುದರಿಂದ ಬೆವರು ಹಾಗೂ ತೇವಾಂಶದಿಂದಾಗಿ ಆ ಸ್ಥಳದಲ್ಲಿ ಶಿಲೀಂಧ್ರಗಳು ಬೆಳವಣಿಗೆ ಆಗುತ್ತವೆ. ಸ್ಟಿರಾಯ್ಡ್ ಬಳಕೆಯಿಂದಲೂ ಕಂಡುಬರುತ್ತಿದೆ ಎಂದು ತಿಳಿಸಿದರು.