ನಾನು ಕಾನೂನು ಪಾಲಿಸುವ ಪ್ರಜೆ, ವೈದ್ಯಕೀಯ ಚಿಕಿತ್ಸೆಗಾಗಿ ಮಾತ್ರ ಭಾರತವನ್ನು ತೊರೆದಿದ್ದೆ - ಮೆಹುಲ್ ಚೋಕ್ಸಿ | ಜನತಾ ನ್ಯೂಸ್
1488
ಡೊಮಿನಿಕಾ : ದೇಶದಿಂದ ಪಲಾಯನ ಮಾಡಿದ್ದ ಡೈಮಂಡ್ ವ್ಯಾಪಾರಿ ಮೆಹುಲ್ ಚೋಕ್ಸಿ ಅವರು ತನ್ನನ್ನು "ಕಾನೂನು ಪಾಲಿಸುವ ಪ್ರಜೆ" ಎಂದು ಅಫಿಡವಿಟ್ ನಲ್ಲಿ ಹೇಳಿಕೊಂಡಿದ್ದಾರೆ ಮತ್ತು ಯುನೈಟೆಡ್ ಸ್ಟೇಟ್ಸ್ ನಲ್ಲಿ ವೈದ್ಯಕೀಯ ಚಿಕಿತ್ಸೆಗಾಗಿ ಮಾತ್ರ ಭಾರತವನ್ನು ತೊರೆದಿರುವುದಾಗಿ ಹೇಳಿಕೊಂಡಿದ್ದಾರೆ. ತನ್ನ ವಿರುದ್ಧ ನಡೆಯುತ್ತಿರುವ ತನಿಖೆಯ ಭಾಗವಾಗಿ ಯಾವುದರ ಬಗ್ಗೆಯೂ "ಸಂದರ್ಶನ" ಮಾಡಲು ಅಧಿಕಾರಿಗಳನ್ನು ಆಹ್ವಾನಿಸಿದ್ದೇನೆ, ಎಂದು ಹೇಳಿಕೊಂಡಿದ್ದಾನೆ.
ಚೋಕ್ಸಿ ಮತ್ತು ಅವರ ಸೋದರಳಿಯ ನೀರವ್ ಮೋದಿ ಅವರು 2018ರ ಜನವರಿ ಮೊದಲ ವಾರದಲ್ಲಿ ಪಂಜಾಬ್ ನ್ಯಾಷನಲ್ ಬ್ಯಾಂಕಿ(ಪಿಎನ್‌ಬಿ)ನಲ್ಲಿ ನಡೆಸಿದ ಕೋಟ್ಯಂತರ ಹಗರಣವು ಭಾರತೀಯ ಬ್ಯಾಂಕಿಂಗ್ ಉದ್ಯಮವನ್ನು ಬೆಚ್ಚಿಬೀಳಿಸಿದೆ. ಲೆಟರ್ಸ್ ಆಫ್ ಅಂಡರ್ಟೇಕಿಂಗ್(ಎಲ್‌ಒಯು) ಪಡೆಯಲು ಇವರಿಬ್ಬರು ಸರ್ಕಾರಿ ಬ್ಯಾಂಕಿನ ಅಧಿಕಾರಿಗಳಿಗೆ ಲಂಚ ನೀಡಿದ್ದಾರೆ, ಅದರ ಆಧಾರದ ಮೇಲೆ ಅವರು ಸಾಗರೋತ್ತರ ಬ್ಯಾಂಕುಗಳಿಂದ ಸಾಲವನ್ನು ಪಡೆದರು, ಅದು ಪಾವತಿಸದೆ ಉಳಿದಿದೆ.
ಭಾರತಕ್ಕೆ ಗಡೀಪಾರು ಮಾಡಬೇಕೆಂದು ಮನವಿ ವಿಚಾರಣೆ ನಡೆಸುತ್ತಿರುವ ಡೊಮಿನಿಕಾ ಹೈಕೋರ್ಟ್‌ಗೆ ಅಫಿಡವಿಟ್ ಸಲ್ಲಿಸಿದ ಚೋಕ್ಸಿ, ಕಾನೂನು ಪಾಲನೆ ತಪ್ಪಿಸಲಿಲ್ಲ ಮತ್ತು ಅವರು ದೇಶವನ್ನು ತೊರೆದಾಗ ಅವರ ವಿರುದ್ಧ ಯಾವುದೇ ವಾರಂಟ್ ಇಲ್ಲ ಎಂದು ಹೇಳಿದ್ದಾನೆ.
ಡೊಮಿನಿಕಾ ಹೈಕೋರ್ಟ್‌ಗೆ ತನ್ನ ವಕೀಲರ ಮೂಲಕ ಅಫಿಡವಿಟ್ ಸಲ್ಲಿಸಿರುವ ಚೋಕ್ಸಿ, "ನನ್ನನ್ನು ಸಂದರ್ಶನ ಮಾಡುವಂತೆ ಭಾರತೀಯ ಅಧಿಕಾರಿಗಳಿಗೆ ಆಹ್ವಾನವನ್ನು ನೀಡುತ್ತಿದ್ದೇನೆ. ಅವರು ನನ್ನ ವಿರುದ್ಧ ನಡೆಸುತ್ತಿರುವ ವಿಚಾರಣೆಗೆ ಸಂಬಂಧಿಸಿದಂತೆ ನನಗೆ ಅವರು ಯಾವುದೇ ಪ್ರಶ್ನೆಗಳನ್ನು ಬೇಕಾದರೂ ಕೇಳಲಿ" ಎಂದು ಹೇಳಿದ್ದಾನೆ.
"ನಾನು ಭಾರತದಲ್ಲಿನ ಕಾನೂನು ಕ್ರಮಗಳಿಂದ ತಪ್ಪಿಸಿಕೊಂಡಿಲ್ಲ. ಅಮೆರಿಕದಲ್ಲಿ ವೈದ್ಯಕೀಯ ನೆರವು ಪಡೆಯುವುದಕ್ಕಾಗಿ ಭಾರತವನ್ನು ತ್ಯಜಿಸುವ ವೇಳೆ ನನ್ನ ವಿರುದ್ಧ ಭಾರತದ ಕಾನೂನು ಜಾರಿ ಸಂಸ್ಥೆಗಳಿಂದ ಯಾವುದೇ ವಾರಂಟ್ ಜಾರಿಯಾಗಿರಲಿಲ್ಲ" ಎಂದು ಚೋಕ್ಸಿ ತಿಳಿಸಿದ್ದಾನೆ.
ಡೊಮಿನಿಕಾದ ಕೋರ್ಟ್‌ಗೆ ಹಾಜರಾಗುವುದರಿಂದ ತಪ್ಪಿಸಿಕೊಳ್ಳುವ ಯಾವ ಉದ್ದೇಶವೂ ನನ್ನಲ್ಲಿ ಇಲ್ಲ. ರೆಡ್ ಕಾರ್ನರ್ ನೋಟಿಸ್ ಅಂತಾರಾಷ್ಟ್ರೀಯ ವಾರಂಟ್ ಅಲ್ಲ. ನನ್ನನ್ನು ಪತ್ತೆಹಚ್ಚಲು ಮತ್ತು ಗಡಿಪಾರು ಪ್ರಕ್ರಿಯೆ ಮೂಲಕ ಭಾರತಕ್ಕೆ ಶರಣಾಗತಗೊಳಿಸಲು ಭಾರತದ ಪರವಾಗಿ ಇಂಟರ್‌ಪೋಲ್ ಮಾಡಿರುವ ಮನವಿಯಷ್ಟೇ, ಎಂದು ಹೇಳಿದ್ದಾನೆ.
ಏತನ್ಮಧ್ಯೆ, ಡೊಮಿನಿಕಾ ಹೈಕೋರ್ಟ್ ವಿಚಾರಣೆಯನ್ನು ಮುಂದೂಡಿದ ನಂತರ ಚೋಕ್ಸಿಯನ್ನು ಭಾರತಕ್ಕೆ ಕರೆತರಲು ಡೊಮಿನಿಕಾಗೆ ತೆರಳಿದ್ದ ಬಹು-ಏಜೆನ್ಸಿ ತಂಡವು ಭಾರತಕ್ಕೆ ಮರಳಿದೆ.
ಡೊಮಿನಿಕಾದ ನ್ಯಾಯಾಲಯಗಳಲ್ಲಿ ಕಾನೂನು ಹೋರಾಟ ಮುಂದುವರೆದಿದ್ದರಿಂದ ಪಿಎನ್‌ಬಿಯಲ್ಲಿ 13,500 ಕೋಟಿ ರೂ.ಗಳ ಬ್ಯಾಂಕ್ ವಂಚನೆಯಲ್ಲಿ ಬೇಕಾಗಿದ್ದ ಚೋಕ್ಸಿಯನ್ನು ಭಾರತಕ್ಕೆ ಕರೆತರಲು ಅಧಿಕಾರಿಗಳ ತಂಡವು ಸುಮಾರು ಏಳು ದಿನಗಳ ಕಾಲ ಕಾದಿತ್ತು. ಚೋಕ್ಸಿಯ ವಕೀಲರು ಸಲ್ಲಿಸಿದ ಹೇಬಿಯಸ್ ಕಾರ್ಪಸ್ ಅರ್ಜಿಯ ವಿಚಾರಣೆಯನ್ನು ಡೊಮಿನಿಕಾ ಹೈಕೋರ್ಟ್ ಗುರುವಾರ ಮುಂದೂಡಿದೆ.
