ಗಲ್ವಾನ್ ಘರ್ಷಣೆ ಬಳಿಕ ಚೀನಾಕ್ಕೆ ಸೈನ್ಯಕ್ಕೆ ಉತ್ತಮ ತರಬೇತಿ ಮತ್ತು ಸಿದ್ಧತೆ ಅಗತ್ಯತೆಯ ಅರಿವಾಗಿದೆ - ಸಿಡಿಎಸ್ ಬಿಪಿನ್ ರಾವತ್ | ಜನತಾ ನ್ಯೂಸ್
1644
ನವದೆಹಲಿ : ಕಳೆದ ವರ್ಷ ಗಾಲ್ವಾನ್ ಕಣಿವೆ ಮತ್ತು ಲಡಾಖ್ ಪ್ರದೇಶದ ಇತರ ಪ್ರದೇಶಗಳಲ್ಲಿ ಭಾರತೀಯ ವಾಸ್ತವ ನಿಯಂತ್ರಣ ರೇಖೆಯಲ್ಲಿ(ಎಲ್ಎಸಿ) ಭಾರತೀಯ ಪಡೆಗಳೊಂದಿಗೆ ಮುಖಾಮುಖಿಯಾದ ಬಳಿಕ, ಚೀನಾದ ಸೈನ್ಯಕ್ಕೆ ಉತ್ತಮ ತರಬೇತಿ ಮತ್ತು ಸಿದ್ಧತೆ ಅಗತ್ಯವೆಂದು ಅವರು ಅರಿತುಕೊಂಡಿದ್ದಾರೆ, ಎಂದು ರಕ್ಷಣಾ ಮುಖ್ಯಸ್ಥ(ಸಿಡಿಎಸ್) ಜನರಲ್ ಬಿಪಿನ್ ರಾವತ್ ಹೇಳಿದ್ದಾರೆ.
ಪೀಪಲ್ಸ್ ಲಿಬರೇಶನ್ ಆರ್ಮಿ ಗಡಿನಾಡಿನಲ್ಲಿ ಟಿಬೆಟಿಯನ್ನರನ್ನು ನೇಮಕ ಮಾಡುವ ಪ್ರಯತ್ನಗಳನ್ನು ಚುರುಕುಗೊಳಿಸಿದ ಕುರಿತು ವರದಿಗಳು ಬರುತ್ತಿರುವ ಮಧ್ಯೆ, ಸಿಡಿಎಸ್ ಬಿಪಿನ್ ರಾವತ್, ಚೀನಾದ ಸೈನಿಕರನ್ನು ಹೆಚ್ಚಾಗಿ ಅಲ್ಪಾವಧಿಗೆ ಸೇರಿಸಿಕೊಳ್ಳಲಾಗುತ್ತದೆ ಮತ್ತು ಹಿಮಾಲಯದ ಪರ್ವತ ಭೂಪ್ರದೇಶದಲ್ಲಿ ಹೋರಾಡುವ ಅನುಭವ ಅವರಿಗಿಲ್ಲ, ಎಂದು ಹೇಳಿದ್ದಾರೆ.
ಎಲ್ಎಸಿ ಉದ್ದಕ್ಕೂ ಚೀನೀ ಪೀಪಲ್ಸ್ ಲಿಬರೇಶನ್ ಆರ್ಮಿ(ಪಿಎಲ್‌ಎ) ಹೊಸ ಚಟುವಟಿಕೆಗಳ ಕುರಿತಾದ ಪ್ರಶ್ನೆಗೆ ಉತ್ತರಿಸಿದ ಅವರು, "ಭಾರತದ ಗಡಿಯಲ್ಲಿ ಚೀನಾದ ನಿಯೋಜನೆಯು ಬದಲಾವಣೆಗೆ ಒಳಗಾಗಿದೆ, ಅದರಲ್ಲೂ ವಿಶೇಷವಾಗಿ 2020ರ ಮೇ-ಜೂನ್‌ನಲ್ಲಿ ಗಾಲ್ವಾನ್ ಮತ್ತು ಇತರ ಪ್ರದೇಶಗಳಲ್ಲಿನ ಘಟನೆಗಳ ನಂತರ. ಈಗ, ಸೈನಿಕರಿಗೆ ಉತ್ತಮ ತರಬೇತಿ ಮತ್ತು ತಾವು ಸೂಕ್ತವಾಗಿ ಸಿದ್ಧರಾಗಿರಬೇಕು ಎಂದು ಅವರು ಅರಿತುಕೊಂಡರು" ಎಂದು ಸಿಡಿಎಸ್ ರಾವತ್ ಹೇಳಿದ್ದಾರೆ.
ತರಬೇತಿ ಪಡೆದ ಭಾರತೀಯ ಸೈನಿಕರೊಂದಿಗೆ ಘರ್ಷಣೆಯ ನಂತರ 2020ರ ಜೂನ್ 15 ರಂದು ನಡೆದ ಗಾಲ್ವಾನ್ ಕಣಿವೆ ಘರ್ಷಣೆಯಲ್ಲಿ ಚೀನಾದ ಕಡೆಯವರು ಭಾರಿ ನಷ್ಟ ಅನುಭವಿಸಿದರು. "ಅವರ ಸೈನಿಕರು ಮುಖ್ಯವಾಗಿ ನಾಗರಿಕ ಬೀದಿಗಳಿಂದ ಬಂದವರು. ಅವರನ್ನು ಅಲ್ಪಾವಧಿಗೆ ಸೇರಿಸಿಕೊಳ್ಳಲಾಗುತ್ತದೆ. ಈ ಪ್ರದೇಶಗಳಲ್ಲಿ ಹೋರಾಡಲು ಮತ್ತು ಈ ಭೂಪ್ರದೇಶದಲ್ಲಿ ಕಾರ್ಯನಿರ್ವಹಿಸಲು ಅವರಿಗೆ ಹೆಚ್ಚಿನ ಅನುಭವವಿಲ್ಲ" ಎಂದು ಅವರು ಹೇಳಿದರು.
"ಟಿಬೆಟ್ ಸ್ವಾಯತ್ತ ಪ್ರದೇಶವು ಕಠಿಣ ವಲಯವಾಗಿದೆ. ಇದು ಪರ್ವತ ಪ್ರದೇಶವಾಗಿದೆ. ಇದಕ್ಕಾಗಿ ನಿಮಗೆ ವಿಶೇಷ ತರಬೇತಿ ಬೇಕಾಗುತ್ತದೆ, ಇದರಲ್ಲಿ ನಮ್ಮ ಸೈನಿಕರು ಬಹಳ ಪ್ರವೀಣರು, ಏಕೆಂದರೆ ನಮಗೆ ಸಾಕಷ್ಟು ಪರ್ವತ ಯುದ್ಧದ ತರಬೇತಿ ಇದೆ, ನಾವು ಪರ್ವತಗಳಲ್ಲಿ ಕಾರ್ಯನಿರ್ವಹಿಸುತ್ತೇವೆ ಮತ್ತು ನಮ್ಮ ಅಸ್ತಿತ್ವವನ್ನು ನಿರಂತರವಾಗಿ ಕಾಪಾಡಿಕೊಳ್ಳುತ್ತೇವೆ", ಅವರು ಹೇಳಿದರು.
"ಆದರೆ ಚೀನಿಯರಿಗೆ ಅದು ಹಾಗಲ್ಲ. ಇದು ಈಗ ಅವರು ನಡೆಸುತ್ತಿರುವ ತರಬೇತಿಯ ಒಂದು ಭಾಗವಾಗಿದೆ. ನಾವು ನಮ್ಮ ಕಾವಲು ಕಾಯಬೇಕು ಮತ್ತು ಚೀನಿಯರ ಎಲ್ಲಾ ಚಟುವಟಿಕೆಗಳ ಬಗ್ಗೆ ನಿಗಾ ಇಡಬೇಕು. ಹಾಗೆ ಮಾಡುವಾಗ, ಎಲ್ಎಸಿ ಉದ್ದಕ್ಕೂ ನಾವು ನಮ್ಮ ಉಪಸ್ಥಿತಿ ಕಾಪಾಡಿಕೊಳ್ಳಬೇಕು," ಅವರು ಹೇಳಿದರು.
