ರಕ್ಷಣೆಗಾಗಿ ಪೊಲೀಸ್ ಕಮಿಷನರ್ ಮೊರೆ ಹೋದ ಪ್ರೇಮಿಗಳು! | ಜನತಾ ನ್ಯೂಸ್
ಹುಬ್ಬಳ್ಳಿ : ವಿರೋಧದ ನಡುವೆಯೂ ಮದುವೆಯಾದ ಜೋಡಿಗೆ ಯುವತಿ ಪೋಷಕರು ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿ ರಕ್ಷಣೆ ಕೋರಿ ಪತಿಯ ಜತೆ ಪೊಲೀಸ್ ಕಮಿಷನರ್ ಕಚೇರಿಗೆ ದಾವಿಸಿದ್ದಾರೆ.
ಮನೆಯಲ್ಲಿ ಮದುವೆಗೆ ಒಪ್ಪದ ಕಾರಣ ರಿಜಿಸ್ಟ್ರಾರ್ ಮ್ಯಾರೆಜ್ ಆಗಿದ್ದು, ಕುಟುಂಬಸ್ಥರು ಈಗ ಕಿರುಕುಳ ನೀಡುತ್ತಿದ್ದಾರೆ. ಜುಲೈ 2 ರಂದು ಗದಗ ಜಿಲ್ಲೆಯ ಮುಂಡರಗಿಯಲ್ಲಿ ರಿಜಿಸ್ಟ್ರಾರ್ ಮದುವೆ ಮಾಡಿಕೊಂಡಿದ್ದು, ತಮ್ಮ ತಂದೆ ಪ್ರಭಾವಿಯಾಗಿರುವದರಿಂದ ತಮಗೆ ಜೀವ ಭಯವಿದೆ. ಹಾಗು ತಮಗೆ ಸಹಾಯ ಮಾಡಿದವರಿಗೂ ಧಮ್ಕಿ ಹಾಕುತ್ತಿದ್ದು, ರಕ್ಷಣೆ ನೀಡುವಂತೆ ಅವರು ಮನವಿ ಮಾಡಿದ್ದಾರೆ.
ರಾಜಕೀಯ ಮುಖಂಡರ ಮಗಳು ಮೋನಲ್, ಜಿಮ್ ಟ್ರೈನರ್ ರಾಹುಲ್ ನನ್ನು ಮನೆಯವರ ಒಪ್ಪಿಗೆ ಇಲ್ಲದೆ ವಿವಾಹವಾಗಿದ್ದಾರೆ. ಹುಬ್ಬಳ್ಳಿಯ ರಾಹುಲ್ ಹಾಗೂ ಮೋನಲ್ರದ್ದು 7 ವರ್ಷದ ಪ್ರೀತಿ. ಅಲ್ಲದೆ ಮೋನಲ್ ಮನೆಯಲ್ಲಿ ಈ ವಿಷಯ ಗೊತ್ತಿತ್ತು. ಆದರೆ ಈ ಯುವಕ ಕೆಳಜಾತಿಯವನು ಎಂದು ಮೋನಲ್ ಕುಟುಂಬಸ್ಥರು ಮದುವೆಗೆ ಅಡ್ಡಿ ಪಡಿಸಿದ್ದರು.
ಹೀಗಾಗೇ ಕಳೆದ ವಾರ ಈ ಜೋಡಿ ಮನೆ ಬಿಟ್ಟು ಹೋಗಿ, ಗದಗ ಜಿಲ್ಲೆಯ ಮುಂಡರಗಿ ಸಬ್ ರಿಜಿಸ್ಟ್ರಾರ್ ಕಚೇರಿಯಲ್ಲಿ ಮದುವೆಯಾಗಿ ಹುಬ್ಬಳ್ಳಿಗೆ ಮರಳಿ ಬಂದಿದ್ದಾರೆ.
ನಮಗೆ ಜೀವಭಯವಿದೆ. ನಾವಿಬ್ಬರು ವಯಸ್ಕರಿದ್ದು, ಕಾನೂನಿನ ಪ್ರಕಾರವೇ ಮದುವೆಯಾಗಿದ್ದೇವೆ. ನಮ್ಮ ಕುಟುಂಬಸ್ಥರು ಪತಿಯ ಕುಟುಂಬಕ್ಕೆ ಹಾಗೂ ನಮ್ಮ ಮದುವೆಗೆ ಸಹಾಯ ಮಾಡಿದ ನಮ್ಮ ಸ್ನೇಹಿತರಿಗೆ ವಿನಾ ಕಾರಣ ಕಿರುಕುಳ ನೀಡುತ್ತಿದ್ದಾರೆ. ಹೀಗಾಗೇ ನಮಗೆ ರಕ್ಷಣೆ ಬೇಕು ಎಂದು ಪ್ರೀತಿಸಿ ಮದುವೆಯಾದ ಯುವತಿ ಮೋನಲ್ ತಿಳಿಸಿದ್ದಾರೆ.