4ಜಿ ನೆಟ್ವರ್ಕ್ ಪ್ರಾರಂಭಿಸಿದ ಬಿಎಸ್ಎನ್ಎಲ್ : ಆತ್ಮನಿರ್ಭರ ಭಾರತ ರೂಪುಗೊಳ್ಳುತ್ತಿದೆ - ಕೇಂದ್ರಸಚಿವ ವೈಷ್ಣವ್ | ಜನತಾ ನ್ಯೂಸ್
1932
ನವದೆಹಲಿ : ಸರ್ಕಾರಿ ಸ್ವೌಮ್ಯದ ಭಾರತ ಸಂಚಾರ್ ನಿಗಮ್ ಲಿಮಿಟೆಡ್(ಬಿಎಸ್ಎನ್ಎಲ್) ತನ್ನ 4ಜಿ ನೆಟ್ವರ್ಕ್ ಅನ್ನು ನಿನ್ನೆ ರವಿವಾರ ಪ್ರಾರಂಭಿಸಿದೆ. ಕೇಂದ್ರ ಸಂವಹನ, ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವರಾದ ಅಶ್ವಿನಿ ವೈಷ್ಣವ್ ಅವರು ಬಿಎಸ್ಎನ್ಎಲ್ ನ ಭಾರತೀಯ 4G ನೆಟ್ವರ್ಕ್ ಮೂಲಕ ಮೊದಲ ಕರೆ ಮಾಡಿದ್ದಾರೆ.
ದೇಶದ ಈ ಹೊಸ ಅಭಿವೃದ್ಧಿಯ ಬಗ್ಗೆ ತಿಳಿಸಲು ಕೇಂದ್ರ ಸಚಿವರು ಟ್ವೀಟ್ ಮಾಡಿದ್ದಾರೆ.
"ಬಿಎಸ್‌ಎನ್‌ಎಲ್‌ನ ಭಾರತೀಯ 4ಜಿ ನೆಟ್ವರ್ಕ್ ಮೂಲಕ ಮೊದಲ ಕರೆ ಮಾಡಲಾಯಿತು(ವಿನ್ಯಾಸ ಮತ್ತು ಭಾರತದಲ್ಲಿ ತಯಾರಿಸಲಾಗಿದೆ)" ಎಂದು ನಿನ್ನೆ ಸಂಜೆ ಟ್ವೀಟ್ ಮಾಡಿದ್ದಾರೆ.
ಹಾಗೆಯೇ, "ಪ್ರಧಾನಿ ನರೇಂದ್ರ ಮೋದಿ ಜೀ ಅವರ ಆತ್ಮನಿರ್ಭರ ಭಾರತ ದೃಷ್ಟಿಕೋನ ರೂಪುಗೊಳ್ಳುತ್ತಿದೆ" ಎಂದು ಟ್ವೀಟ್ ನಲ್ಲಿ ಹೇಳಿದ್ದಾರೆ.
ಜಾಗತಿಕ ಮಾರುಕಟ್ಟೆಯನ್ನು ಸಮಯಕ್ಕೆ ಸರಿಯಾಗಿ ತಲುಪಲು 6G ಮತ್ತು ಇತರ ಭವಿಷ್ಯದ ತಂತ್ರಜ್ಞಾನಗಳ ಮೇಲೆ ಕೆಲಸ ಮಾಡಲು ಆರಂಭಿಸುವಂತೆ ಸರ್ಕಾರಿ ಸ್ವಾಮ್ಯದ ಟೆಲಿಕಾಂ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ ಸಿ-ಡಿಓಟಿ ಯನ್ನು ಟೆಲಿಕಾಂ ಕಾರ್ಯದರ್ಶಿ ಕೆ ರಾಜಾರಾಮನ್ ಕೇಳಿದ್ದಾರೆ ಎಂಬ ಸುದ್ದಿಯನ್ನು ಪಿಟಿಐ ವರದಿ ಮಾಡಿರುವ ಬೆನ್ನಲ್ಲೇ, ಈ ಸುದ್ಧಿ ಬಂದಿದೆ.
ಸ್ಯಾಮ್‌ಸಂಗ್, ಹುವಾವೇ, ಎಲ್‌ಜಿ ಮತ್ತು ಇತರ ಕೆಲವು ಕಂಪನಿಗಳು 6ಜಿ ತಂತ್ರಜ್ಞಾನಗಳಲ್ಲಿ ಕೆಲಸ ಮಾಡಲು ಆರಂಭಿಸಿವೆ, ಇದು 5ಜಿಗಿಂತ 50 ಪಟ್ಟು ವೇಗವಾಗಿದೆ ಮತ್ತು 2028-2030 ರ ನಡುವೆ ವಾಣಿಜ್ಯ ಬಳಕೆಗೆಂದು ಬಿಡುಗಡೆಯಾಗುವ ನಿರೀಕ್ಷೆಯಿದೆ.
ಸೈದ್ಧಾಂತಿಕ ಲೆಕ್ಕಾಚಾರಗಳ ಪ್ರಕಾರ, 5G ಯ ಗರಿಷ್ಠ ಡೇಟಾ ಡೌನ್‌ಲೋಡ್ ವೇಗವನ್ನು ಪ್ರತಿ ಸೆಕೆಂಡಿಗೆ 20 ಗಿಗಾಬಿಟ್ (ಜಿಬಿಪಿಎಸ್) ನಲ್ಲಿ ನಿಗದಿಪಡಿಸಲಾಗಿದೆ. ಆದಾಗ್ಯೂ, ವೊಡಾಫೋನ್ ಐಡಿಯಾ ಭಾರತದಲ್ಲಿ ಪ್ರಯೋಗಗಳ ಸಮಯದಲ್ಲಿ 3.7 ಜಿಬಿಪಿಎಸ್ ಗರಿಷ್ಠ ವೇಗವನ್ನು ಸಾಧಿಸಿದೆ ಎಂದು ಹೇಳಿಕೊಂಡಿದೆ.
