ಅಂಗಾರಕ ಸಂಕಷ್ಠಿ: ಗಣಪತಿ ದೇವಸ್ಥಾನಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸಿದ ಭಕ್ತರು | Janata.news
948
ಕಾರವಾರ : ತಾಲೂಕಿನಾದ್ಯಂತ ಈ ವರ್ಷದ ಮೊದಲ ಅಂಗಾರಕ ಸಂಕಷ್ಠಿ ಚತುರ್ಥಿಯನ್ನು ಭಕ್ತರು ಭಯ ಭಕ್ತಿಯಿಂದ ಆಚರಿಸಿದರು. ಭಕ್ತರಿಗೆ ಮಂಗಳವಾರದ ಸಂಕಷ್ಠಿ ಚತುರ್ಥಿ ವಿಶೇಷ ದಿನವಾಗಿತ್ತು. ನಗರ ಹಾಗೂ ಗ್ರಾಮೀಣ ಭಾಗಗಳಲ್ಲಿನ ಗಣಪತಿ ದೇವಸ್ಥಾನಗಳಲ್ಲಿ ಭಕ್ತರು ಇಂದು ಕಿಕ್ಕಿರಿದು ನೆರೆದಿದ್ದರು. ತಾಲೂಕಿನ ಅಮದಳ್ಳಿ, ಅಸ್ನೋಟಿ ಮುಂತಾದ ಪ್ರಸಿದ್ಧ ಮಹಾಗಣಪತಿ ದೇವಾಲಯಗಳಲ್ಲಿ ಜನಜಂಗುಳಿಯ ನಡುವೆ ಭಕ್ತರು ದೇವರ ದರ್ಶನ ಪಡೆದುಕೊಂಡರು. ತಾಲೂಕಿನ ವಿವಿಧೆಡೆ ಹಾಗೂ ಸಮೀಪದ ಗೋವಾ ಮುಂತಾದ ಕಡೆಯಿಂದ ಕುಳಾವಿಗಳು ಆಗಮಿಸಿ ಕುಲದೇವರಾದ ಅಸ್ನೋಟಿಯ ಮಹಾಗಣಪತಿಗೆ ವಿಶೇಷ ಪೂಜೆ ಸಲ್ಲಿಸಿದರು.
ಇಲ್ಲಿನ ಎಲ್ಲ ವಿನಾಯಕನ ದೇವಾಲಯಗಳಲ್ಲಿ ಗಣೇಶನಿಗೆ ಪ್ರಿಯವಾದ ಮೋದಕ, ಪಂಚಕಜ್ಜಾಯ, ಹೂವು, ಗರಿಕೆ, ಬಾಳೆ ಮುಂತಾದ ನಾ ನಾ ಬಗೆಯ ಹಣ್ಣು. ಹಂಪಲು, ತೆಂಗಿನಕಾಯಿ, ಉದ್ಬತ್ತಿ, ಕರ್ಪೂರ ಸಮರ್ಪಿಸಿ ಧನ್ಯರಾದರು. ಇಲ್ಲಿನ ವಿವಿಧ ದೇವಾಲಯಗಳಲ್ಲಿ ಬೆಳಗ್ಗೆ 10 ಗಂಟೆಯಿಂದ ಮಧ್ಯಾಹ್ನ 1 ಗಂಟೆಯ ತನಕ ದೇವರಿಗೆ ಅಭಿಷೇಕ, ಗಣಹೋಮ ಮುಂತಾದ ಧಾರ್ಮಿಕ ಕಾರ್ಯಗಳು ಜರುಗಿದವು. ನಗರದ ಹೃದಯ ಭಾಗದಲ್ಲಿರುವ ಸಿದ್ಧಿ ವಿನಾಯಕ ದೇವಸ್ಥಾನ, ಹಬ್ಬುವಾಡಾದ ಗಣಪತಿ ದೇವಸ್ಥಾನ, ಬಸ್ ಡಿಪೆÇೀ ಬಳಿಯ ಮಹಾಗಣಪತಿ, ನಂದನಗದ್ಧಾದ ಸಿದ್ಧಿ ವಿನಾಯಕ,ಸರ್ವೋದಯನಗರದ ಸಿದ್ದಿ ಗಣಪನಿಗೆ ಹಾಗೂ ಗ್ರಾಮಾಂತರ ಪ್ರದೇಶಗಳಲ್ಲಿರುವ ಅಮದಳ್ಳಿಯ ಮಹತೋಬಾರ ಮಹಾಗಣಪತಿ ಮತ್ತು ಅಸ್ನೋಟಿಯ ಮಹಾಗಣಪತಿಗೆ ವಿಶೇಷವಾಗಿ ಅಲಂಕರಿಸಲಾಗಿತ್ತು.
ಗಣಪನಿಗೆ ಬೆಳ್ಳಿ ಕವಚ ಹಾಗೂ ವಿಶೇಷ ಹೂವಿನ ಅಲಂಕಾರದಿಂದ ಸಜ್ಜುಗೊಳಿಸಲಾಗಿತ್ತು. ದೇವಾಲಯಗಳನ್ನು ಸುಣ್ಣ, ಬಣ್ಣ ಹಚ್ಚಿ, ವಿದ್ಯುತ್, ತಳೀರು-ತೋರಣಗಳಿಂದ ಶೃಂಗರಿಸಲಾಗಿತ್ತು. ದೇವಾಲಯದ ಸುತ್ತಮುತ್ತ ಭಾದ್ರಪದ ಹಾಗೂ ಮಾಘ ಚೌತಿಯಂತೆ,ಭಕ್ತರ ಜಂಗುಳಿ ನೆರೆದಿತ್ತು. ಅಂಗಾರಕ ಸಂಕಷ್ಠಿ ನಿಮಿತ್ತ ವಿವಿಧ ದೇವಾಲಯಗಳಲ್ಲಿ ಹಮ್ಮಿಕೊಂಡ ಗಣಹೋಮದಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಭಕ್ತರು ಭಾಗವಹಿಸಿದರು. ಗಣಹೋಮದಲ್ಲಿ ಮಧ್ಯಾಹ್ನದ ಪೂರ್ಣಾಹುತಿ ಸಮರ್ಪಿಸಿ ಸಾಮೂಹಿಕ ಪ್ರಾರ್ಥನೆ ನಡೆಸಿದರು. ಭಕ್ತರು ಮಧ್ಯಾಹ್ನ ಮತ್ತು ರಾತ್ರಿ ಸಮಯದ ಮಹಾಮಂಗಳಾರತಿಯಲ್ಲಿ ಪಾಲ್ಗೊಂಡು ತೀರ್ಥ ಪ್ರಸಾದ ಸ್ವೀಕರಿಸಿದರು. ಮಧ್ಯಾಹ್ನದ ಪೂಜೆಗೆ ದಣಿದು ಬರುವ ಭಕ್ತರಿಗೆ ಮಜ್ಜಿಗೆ ಪಾನಕದ ವ್ಯವಸ್ಥೆ ಮಾಡಲಾಗಿತ್ತು.ಪೂಜೆಗೋಸ್ಕರ ನೆರೆದ ಭಕ್ತರಿಗೆ ಪಂಚಕಜ್ಜಾಯ,ಬುಂದಿ ಲಾಡು,ಕಡಲೆ ಅವಲಕ್ಕಿ ಪ್ರಸಾದ ವಿತರಿಸುತ್ತಿರುವುದು ಸಾಮಾನ್ಯವಾಗಿ ಎಲ್ಲ ದೇವಾಲಯಗಳಲ್ಲಿ ಕಂಡು ಬಂತು.
ಅಮದಳ್ಳಿಯ ವೀರಗಣಪತಿಗೆ ವಿಶೇಷ ಪೂಜೆ
ತಾಲೂಕಿನ ಅಮದಳ್ಳಿಯ ವೀರಗಣಪತಿ ದೇವಸ್ಥಾನದಲ್ಲಿ ಅಂಗಾರಕ ಸಂಕಷ್ಟಿಯ ನಿಮಿತ್ತ ಮಂಗಳವಾರ ವಿಶೇಷ ಪೂಜೆ ನಡೆಯಿತು. ದೇವಸ್ಥಾನದಲ್ಲಿ ಸಂಕಷ್ಟಿಯ ಧಾರ್ಮಿಕ ಕಾರ್ಯಗಳು ಮುಂಜಾನೆ 5ಗಂಟೆಯ ಮಂಗಳಾರತಿಯಿಂದ ಆರಂಭಗೊಂಡಿತು. ರಾತ್ರಿ 10.00 ರವರೆಗೂ ಭಕ್ತರು ಆಗಮಿಸಿ ದೇವರ ಸೇವೆ ಮಾಡಿದರು. ತೆಂಗಿನಕಾಯಿ ಗಣಹೋಮ, ಅಭಿಷೇಕ, ಮಹಾಪೂಜೆ, ಪ್ರಸಾದ ವಿತರಣೆ ಹಾಗೂ ರಂಗಪೂಜೆಯು ಪ್ರಮುಖವಾಗಿ ನೆರವೇರಿತು. ಇಲ್ಲಿ ಸುಮಾರು 1.5 ಕ್ವಿಂಟಲ್ ಅವಲಕ್ಕಿ ಹಾಗೂ ಕಪ್ಪು ಕಡಲೆಯ ನೈವೇದ್ಯ ಪ್ರಸಾದವನ್ನು ಆಡಳಿತ ಮಂಡಳಿಯು ವಿಶೇಷವಾಗಿ ಹಂಚಿದ್ದು ದಾಖಲಾಯಿತು. ಮಂಗಳವಾರದ ಅಂಗಾರಕ ಸಂಕಷ್ಟಿ ಪೂಜೆಗಾಗಿ ವಿಶೇಷವಾಗಿ ತಯಾರು ಮಾಡಿದ್ದ ಸುಮಾರು 1.5 ಕ್ವಿಂಟಲ್ ಕಡಲೆಯ ಪ್ರಸಾದ ಮಧ್ಯಾಹ್ನದ ವೇಳೆಗೆ ಖಾಲಿಯಾಗಿತ್ತು. ಸುಮಾರು ಐದು ಸಾವಿರಕ್ಕೂ ಅಧಿಕ ಸಂಖ್ಯೆಯ ಭಕ್ತರು ಸಂಕಷ್ಟಿಯ ಈ ಪೂಜಾ ಕಾರ್ಯಗಳಲ್ಲಿ ಪಾಲ್ಗೊಂಡು ಪ್ರಸಾದ ಸ್ವೀಕರಿಸಿದರು, ಎಂದು ದೇವಸ್ಥಾನದ ಆಡಳಿತ ಮಂಡಳಿಯ ಪ್ರಮುಖ ರವೀಂದ್ರ ಅಮದಳ್ಳಿ ತಿಳಿಸಿದ್ದಾರೆ.
ಸೂಚನೆ : ಮೇಲಿನ ಮಾಹಿತಿಗಳನ್ನು ನಮ್ಮ ಅನುಮೋದನೆ ಇಲ್ಲದೆ ಕಾಪಿ ಮಾಡುವುದು ಅಥವಾ ಮರುಪ್ರಕಟಣೆ ಮಾಡುವುದು ಕ್ರಿಮಿನಲ್ ಅಪರಾಧವಾಗಿದ್ದು, ಬೆಂಗಳೂರು ಕೋರ್ಟನಲ್ಲಿ ತಕ್ಕ ಕಾನೂನು ಕ್ರಮ ಕೈಗೊಳ್ಳಲಾಗುವುದು.
