ರೂಪಾಯಿ ಸಹಾಯಕ್ಕೆ ಕರೆನ್ಸಿ ವಿನಿಮಯದ ಒಪ್ಪಂದ : 75 ಶತಕೋಟಿ ಡಾಲರ್‌ ಕರೆನ್ಸಿ ವಿನಿಮಯ | Janata news
795
ನವದೆಹಲಿ : ಇಂದು ಪ್ರಧಾನಿ ನರೇಂದ್ರ ಮೋದಿ ಎರಡು ಯಶಸ್ವಿ ಜಪಾನ್ ಪ್ರವಾಸ ಮುಗಿಸಿ ಸ್ವದೇಶಕ್ಕೆ ಆಗಮಿಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರು ಜಪಾನ್ ಪ್ರಧಾನಿ ಶಿಂಜೋ ಅಬೆ ಅವರ ಜತೆ ತಮ್ಮ ಐದನೇ ಶೃಂಗಸಭೆ ಮುಕ್ತಾಯಗೊಳಿಸಿದ್ದು, ಉಭಯ ದೇಶಗಳು ಮಹತ್ವದ 75 ಶತಕೋಟಿ ಡಾಲರ್‌ ಮೌಲ್ಯದ ದ್ವಿಪಕ್ಷೀಯ ಕರೆನ್ಸಿ ವಿನಿಮಯ ಒಪ್ಪಂದಕ್ಕೆ ಸಹಿ ಹಾಕಿವೆ. ಈ ಮಹತ್ವದಿಂದ ಒಪ್ಪಂದಿಂದ ಉಭಯ ದೇಶಗಳ ಅರ್ಥಿಕ ಸಂಬಂಧ ಹೆಚ್ಚುವುದರೊಂದಿಗೆ, ಭಾರತದ ರೂಪಾಯಿ ಹಾಗೂ ಭಾರತದ ಬಂಡವಾಳ ಮಾರುಕಟ್ಟೆಯಲ್ಲಿ ಸ್ಥಿರತೆ ಉಂಟುಮಾಡುವ ಉದ್ದೇಶ ಹೊಂದಿದೆ.
ಭಾರತ-ಜಪಾನ್ ನಡುವೆ ಹೆಚ್ಚುತ್ತಿರುವ ವ್ಯೂಹಾತ್ಮಕ ಏಕತೆಯಿಂದ ಉಭಯ ದೇಶಗಳಿಗೂ ಅನುಕೂಲವಾಗಿದ್ದು, ವಿದೇಶಾಂಗ ವ್ಯವಹಾರ ಮತ್ತು ರಕ್ಷಣಾ ಸಚಿವರ ಮಟ್ಟದಲ್ಲಿ 2+2 ಮಾತುಕತೆ ಆರಂಭಿಸಲು ಒಮ್ಮತ ವ್ಯಕ್ತಪಡಿಸಿವೆ. ಕರೆನ್ಸಿ ವಿನಿಮಯ ಒಪ್ಪಂದದಿಂದ ಭಾರತದಲ್ಲಿ ಲಭ್ಯವಿರುವ ವಿದೇಶಿ ಬಂಡವಾಳವನ್ನು ಅಗತ್ಯಕ್ಕೆ ತಕ್ಕಂತೆ ಬಳಸುವ ಅವಕಾಶ ದೊರೆಯಲಿದೆ, ಎಂದು ಹಣಕಾಸು ಸಚಿವಾಲಯದ ಪ್ರಕಟಣೆ ತಿಳಿಸಿದೆ.
ಉಭಯ ನಾಯಕರ ಶೃಂಗಸಭೆಯ ಬಳಿಕ ಬಿಡುಗಡೆ ಮಾಡಿದ ಭಾರತ ಜಪಾನ್ ಹೇಳಿಕೆಯಲ್ಲಿ, ಕರೆನ್ಸಿ ವಿನಿಮಯವನ್ನು ಸ್ವಾಗತಿಸಲಾಗಿದೆ. ಚಾಲ್ತಿ ಖಾತೆಯ ವಿತ್ತೀಯ ಕೊರತೆಯನ್ನು ತುಂಬಿಕೊಳ್ಳುವಲ್ಲಿ ಈ ಕರೆನ್ಸಿ ವಿನಿಮಯ ಒಪ್ಪಂದ ಧನಾತ್ಮಕ ಪರಿಣಾಮ ಬೀರಲಿದೆ. ನಮ್ಮ ಹಣಕಾಸು ಮತ್ತು ಕರೆನ್ಸಿ ಮಾರುಕಟ್ಟೆಗೆ ಇದು ಬಲವಾದ ಸಂಕೇತಗಳನ್ನು ನೀಡಲಿದೆ, ಎಂದು 15ನೇ ಹಣಕಾಸು ಆಯೋಗದ ಸದಸ್ಯ ಶಕ್ತಿಕಾಂತ ದಾಸ್‌ ಟ್ವೀಟ್ ಮಾಡಿದ್ದಾರೆ.
