ಪ್ರಧಾನಿ ಮೋದಿ ಸಹಿಯನ್ನೆ ನಕಲಿ ಮಾಡಿದ ಯಾಕೆ ? | Janata news
813
ಬೆಂಗಳೂರು : ರಾಜ್ಯ ಹೈಕೋರ್ಟ್‌ನಲ್ಲಿ ಕೆಲಸ ಪಡೆಯುವ ಸಲುವಾಗಿ ಯುವಕನೋರ್ವ ಬೆಳಗಾವಿ ಮೂಲದ ಸಂಜಯ್ ಕುಮಾರ್(30) ಪ್ರಧಾನಿ ನರೇಂದ್ರ ಮೋದಿ ಅವರ ನಕಲಿ ಸಹಿ ಮಾಡಿರುವ ಪ್ರಕರಣ ಬೆಳಕಿಗೆ ಬಂದಿದೆ.
ಇತ್ತೀಚೆಗೆ ಹೈಕೋರ್ಟ್ ಟೈಪಿಸ್ಟ್ ಹುದ್ದೆಗಾಗಿ ಅರ್ಜಿ ಆಹ್ವಾನಿಸಲಾಗಿತ್ತು. ಈ ವೇಳೆ ಆರೋಪಿ ಸಂಜಯ್ ಕುಮಾರ್ ಕೂಡ ಅರ್ಜಿ ಸಲ್ಲಿಸಿದ್ದ. ಜೊತೆಗೆ ಪ್ರಧಾನಿ ನರೇಂದ್ರ ಮೋದಿ ಅವರ ಸಹಿ ನಕಲಿ ಮಾಡಿದ್ದ ಅಭ್ಯರ್ಥಿ ಫೋರ್ಜರಿ ಲೆಟರ್ ರೆಡಿ ಮಾಡಿದ್ದ ಎನ್ನಲಾಗಿದೆ. ಅಭ್ಯರ್ಥಿಯೊಬ್ಬ ತನಗೆ ಕೆಲಸ ನೀಡುವಂತೆ ಪ್ರಧಾನಿ ಮೋದಿ ಅವರ ಸಹಿ ನಕಲಿ ಮಾಡಿ ಶಿಫಾರಸು ಪತ್ರ ರೆಡಿ ಮಾಡಿದ್ದನು. ಯಾರಿಗೂ ಅನುಮಾನ ಬಾರದಂತೆ ಧಾರವಾಡದಿಂದ ಬೆಂಗಳೂರಿನ ಹೈಕೋರ್ಟ್ಗೆ ಪತ್ರ ಕಳುಹಿಸಿದ್ದನು. ಅದನ್ನು ಡೆಪ್ಯುಟಿ ರಿಜಿಸ್ಟ್ರಾರ್ ಹೆಸರಿಗೆ ರವಾನಿಸಿದ್ದ ಎನ್ನಲಾಗಿದೆ.
ಪತ್ರ ನೋಡಿ ಅನುಮಾನಗೊಂಡ ಡೆಪ್ಯುಟಿ ರಿಜಿಸ್ಟ್ರಾರ್ ವಿಧಾನಸೌಧ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಬಳಿಕ ಪೊಲೀಸರು ಕಾರ್ಯಾಚರಣೆ ನಡೆಸಿದಾಗ ನಕಲಿ ಸಹಿ ಮಾಡಿರುವ ವಿಷಯ ಬೆಳಕಿಗೆ ಬಂದಿದೆ.
ಆರೋಪಿಯನ್ನು ಬಂಧಿಸಿದ ಪೊಲೀಸರು ವಿಚಾರಣೆ ನಡೆಸಿದ ವೇಳೆ ಇಂಟರ್ನೆಟ್ ಸೆಂಟರ್ನಲ್ಲಿ ನಕಲಿ ಲೆಟರ್ ರೆಡಿ ಮಾಡಿದ್ದಾಗಿ ಅಭ್ಯರ್ಥಿ ಸಂಜಯ್ ಬಾಯಿಬಿಟ್ಟಿದ್ದಾನೆ. ಈತ ಹೈಕೋರ್ಟ್ ಟೈಪಿಸ್ಟ್ ಹುದ್ದೆ ಪರೀಕ್ಷೆ ಹಾಗೂ ವೈವಾಗೆ ಹಾಜರಾಗದೇ ಈ ಲೆಟರ್ ಮೂಲಕ ಕೆಲಸ ಪಡೆಯಲು ಈ ಕೆಲಸ ಮಾಡಿದ್ದ ಎಂದು ತಿಳಿದುಬಂದಿದೆ.
