ಪತಿ ಕೊರೋನಾ ವಿಚಾರ ಮುಚ್ಚಿಟ್ಟ ಗರ್ಭಿಣಿಗೂ ಪಾಸಿಟಿವ್: ಆಸ್ಪತ್ರೆಯೇ ಸೀಲ್ಡೌನ್! | Janata news
ಬೆಂಗಳೂರು : ಆಸ್ಪತ್ರೆಗೆ ದಾಖಲಾಗಿದ ಮಹಿಳೆಗೂ ಕೊರೋನಾ ಸೋಂಕಿರುವುದು ದೃಢವಾಗಿದೆ. ಇಡೀ ಆಸ್ಪತ್ರೆಯನ್ನೇ ಮುಚ್ಚುವಂತಾಗಿದೆ. ಆಸ್ಪತ್ರೆಯ ವೈದ್ಯರು ಸೇರಿ ಎಲ್ಲಾ ಸಿಬ್ಬಂದಿ ಇದೀಗ ಕ್ವಾರಂಟೈನ್ ಶಿಕ್ಷೆ ಅನುಭವಿಸಬೇಕಾಗಿದೆ.
ಈ ನಿಟ್ಟಿನಲ್ಲಿ ಮಹಿಳೆಯ ಹೆರಿಗೆ ಮಾಡಿಸಿದ ವೈದ್ಯರು ಹಾಗು ಸಿಬ್ಬಂದಿಗೂ ಕ್ವಾರೆಂಟೈನ್ ವಿಧಿಸಲಾಗಿದೆ. ಈ ಮೂಲಕ ಕೊರೋನಾದಿಂದಾಗಿ ಬೆಂಗಳೂರಿನಲ್ಲಿ 2 ಆಸ್ಪತ್ರೆ ಸೀಲ್ಡ್ಡೌನ್ ಆಗಿದೆ.
ಕೆಂಗೇರಿಯ ದೊಡ್ಡಬಸ್ತಿಯಿಂದ ಬಂದಿದ್ದ ಮಹಿಳೆ ಸಿಜೆರಿಯನ್ ಮೂಲಕ ಡೆಲಿವರಿ ಮಾಡಿಸಿಕೊಂಡಿದ್ದಾಳೆ. ಡೆಲಿವರಿ ನಂತರ ಪತಿ ಕೊರೋನಾ ಪಾಸಿಟಿವ್ ಎಂಬುದನ್ನು ಬಹಿರಂಗ ಪಡಿಸಿದ ಮಹಿಳೆಗೂ ಕೊರೋನಾ ಸೋಂಕು ಇರುವುದು ದೃಢವಾಗಿದೆ. ಸೋಂಕಿರುವುದು ಖೀಚಿತವಾದ ಕೂಡಲೇ ತಾಯಿ ಮಗುವನ್ನು ಬೌರಿಂಗ್ಗೆ ದಾಖಲಿಸಲಾಗಿದೆ.
ಏಪ್ರಿಲ್ 11ರ ಶನಿವಾರದಂದು ಕೆಂಗೇರಿಯ ದೊಡ್ಡ ಬಸ್ತಿಯ ಗರ್ಭಿಣಿ ಆಸ್ಪತ್ರೆಗೆ ದಾಖಲಾಗಿದ್ದರು. ಅಂದೇ ಹೆರಿಗೆಯನ್ನು ಮಾಡಲಾಗಿತ್ತು. ಪತಿ ಬರುತ್ತಾರೆ. ಅಲ್ಲಿದ್ದಾರೆ, ಇಲ್ಲಿದ್ದಾರೆ ಎಂದು ಸಬೂಬು ಹೇಳಿದ್ದಳು. ತುರ್ತು ಕಾರಣದಿಂದ ಮಾನವೀಯತೆ ಆಧಾರದಲ್ಲಿ ಮಹಿಳೆಗೆ ವೈದ್ಯರು ಹೆರಿಗೆ ಮಾಡಿಸಿದ್ದರು. ನಂತರವೂ ಪತಿ ಬಾರದ ಕಾರಣ ಆರೋಗ್ಯ ಇಲಾಖೆಗೆ ಮಾಹಿತಿ ನೀಡಲಾಯಿತು. ವಿಚಾರ ತಿಳಿದು ಆರೋಗ್ಯಾಧಿಕಾರಿಗಳು ಆಸ್ಪತ್ರೆಗೆ ಭೇಟಿ ನೀಡಿ ವಿಚಾರಿಸಿದಾಗ, ಆಕೆಯ ಪತಿಗೆ ಕೊರೊನಾ ಸೋಂಕು ತಗುಲಿದ್ದು, ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೀತಿದ್ದಿದ್ದರ ಬಗ್ಗೆ ಬಯಲಾಗಿದೆ. ಈಗ ಮಹಿಳೆಗೂ ಕೊರೊನಾ ಸೋಂಕು ಇರುವುದು ದೃಢಪಟ್ಟಿದೆ.
ಆಸ್ಪತ್ರೆಗೆ ಬೀಗ ಹಾಕಿ ಆಸ್ಪತ್ರೆ ಆವರಣದಲ್ಲಿ ಔಷಧ ಸಿಂಪಡಣೆ ಮಾಡಲಾಗಿದೆ. ಇದೀಗ ಅನಿವಾರ್ಯವಾಗಿ 5 ದಿನದ ಮಗುವನ್ನು ತಾಯಿಯಿಂದ ದೂರ ಇಡಲಾಗಿದೆ. ರೆಸಿಡೆನ್ಶಿಯಲ್ ಏರಿಯಾದಲ್ಲಿ ಮನೆ ಇರುವುದರಿಂದ ಆತಂಕ ಹೆಚ್ಚಾಗಿದೆ.
ಈ ವಿಚಾರ ತಿಳಿಯದೇ ಹೆರಿಗೆ ಮಾಡಿಸಿದ್ದ ಲೋಟಸ್ ಆಸ್ಪತ್ರೆ ಸಿಬ್ಬಂದಿ ಕೂಡ ಈಗ ಕ್ವಾರಂಟೈನ್ನಲ್ಲಿದ್ದಾರೆ. ಆಸ್ಪತ್ರೆಯ ವೈದ್ಯರು ಈಗ ಸ್ವಯಂ ನಿರ್ಬಂಧ ಹೇರಿಕೊಂಡಿದ್ದಾರೆ. ಲೋಟಸ್ ಆಸ್ಪತ್ರೆಯನ್ನೂ ಸಂಪೂರ್ಣ ಸ್ಯಾನಿಟೈಸ್ ಮಾಡಿ, ಫ್ಯೂಮಿಗೇಷನ್ ಬಳಿಕ ಆಸ್ಪತ್ರೆಗೆ ಬೀಗ ಹಾಕಲಾಗಿದೆ. ಇಡೀ ಆಸ್ಪತ್ರೆಯನ್ನು ಸೀಲ್ ಮಾಡಲಾಗಿದೆ. ಇದೀಗ ಆ ಮಹಿಳೆಗೆ ಚಿಕಿತ್ಸೆ ನೀಡಿದ್ದ ವೈದ್ಯಕೀಯ ಸಿಬ್ಬಂದಿ, ಆರೈಕೆ ಮಾಡಿದ್ದ ಎಲ್ಲಾ ಸಿಬ್ಬಂದಿಯೂ ಕ್ವಾರಂಟೈನ್ಗೆ ಒಳಗಾಗಿದ್ದಾರೆ.