ನೌಕಾಪಡೆಯ ಯುದ್ಧವಿಮಾನಗಳಾದ ಪಿ8ಐ, ಮಿಗ್-29ಕೆ ಗಳನ್ನು ಲಡಾಖ್ ನಲ್ಲಿ ನಿಯೋಜನೆ | Janata news
ನವದೆಹಲಿ : ಭಾರತೀಯ ನೌಕಾಪಡೆಯ ಪೋಸಿಡಾನ್ 8ಐ ಜಲಾಂತರ್ಗಾಮಿ ತಡೆಯುವ ಕಣ್ಗಾವಲು ವಿಮಾನಗಳು ಪೂರ್ವ ಲಡಾಕ್ ವಲಯದ ಮೇಲೆ ಆಗಾಗ್ಗೆ ಹಾರಾಟ ನಡೆಸುತ್ತಿರುವ ಸಂದರ್ಭದಲ್ಲೇ, ನೌಕಾಪಡೆಯ ಕಡಲ ಯುದ್ಧವಿಮಾನಗಳಾದ ಮಿಗ್-29ಕೆ ಅನ್ನು ಉತ್ತರ ವಲಯದಲ್ಲಿ ಕಾರ್ಯಾಚರಣೆಗಾಗಿ ನಿಯೋಜಿಸಲಾಗಲಿದೆ.
ಅಮೇರಿಕಾದ ಯುಎಸ್ಎಸ್ ನಿಮಿಟ್ಜ್, ಪರಮಾಣು ಚಾಲಿತ ವಿಮಾನವಾಹಕ ನೌಕೆ ಈಗ ದಕ್ಷಿಣ ಚೀನಾ ಸಮುದ್ರದಲ್ಲಿ ತರಬೇತಿ ಕುಶಲತೆಯನ್ನು ಮುಗಿಸಿದ ನಂತರ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳನ್ನು ತಲುಪಿದೆ. ಇದು ಸುಮಾರು 6015 ಸಿಬ್ಬಂದಿಗಳನ್ನು ಹೊಂದಿದ್ದು 90 ವಿಮಾನಗಳು ಮತ್ತು 3 ಸಾವಿರ ಮೆರೈನ್ಗಳನ್ನು ಹೊಂದಿದೆ. ಯುಎಸ್ಎಸ್ ನಿಮಿಟ್ಜ್ ಭಾರತದ ದಕ್ಷಿಣದ ಕಡಲ ಭಾಗ ತಲುಪಿದ ಬೆನ್ನಲ್ಲೇ ಭಾರತೀಯ ನೌಕಾಪಡೆಯ ಕಡಲ ಮಿಗ್-29ಕೆ ಯುದ್ಧವಿಮಾನಗಳನ್ನು ಉತ್ತರ ಗಡಿಭಾಗಕ್ಕೆ ನಿಯೋಜಿಸುವ ನಿರ್ಧಾರ ಪ್ರಕಟವಾಗಿದೆ.
ಭಾರತೀಯ ವಾಯುಪಡೆಯ(ಐಎಎಫ್) ನೆಲೆಗಳಲ್ಲಿ ನೌಕಾ ಯುದ್ಧ ವಿಮಾನಗಳ ನಿಯೋಜನೆಯು ಮೂರು ಸೇವೆಗಳ ನಡುವೆ ಜಂಟಿ ಕಾರ್ಯಾಚರಣೆಯ ಸಾಮರ್ಥ್ಯವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರ ನಿರ್ದೇಶನಗಳಿಗೆ ಅನುಗುಣವಾಗಿ ಮತ್ತು ವಾಯುಪಡೆಯೊಂದಿಗೆ ಉತ್ತರ ಅಥವಾ ಪಶ್ಚಿಮ ಗಡಿಗಳಲ್ಲಿ ಕಡಲ ಯುದ್ಧ ವಿಮಾನಗಳನ್ನು ನಿಯೋಜಿಸುವ ಸಾಧ್ಯತೆಗಾಗಿ ರಕ್ಷಣಾ ಮುಖ್ಯಸ್ಥ ಜನರಲ್ ಬಿಪಿನ್ ರಾವತ್ ಅವರ ಆದೇಶ ಹೊರಡಿಸಿದ್ದಾರೆ ಎನ್ನಲಾಗಿದೆ.
ಭಾರತೀಯ ನೌಕಾಪಡೆಯು 40 ಮಿಗ್-29ಕೆ ಫೈಟರ್ ಜೆಟ್ಗಳನ್ನು ಹೊಂದಿದ್ದು, ಅವುಗಳನ್ನು ವಿಮಾನವಾಹಕ ನೌಕೆ ಐಎನ್ಎಸ್ ವಿಕ್ರಮಾದಿತ್ಯದಲ್ಲಿ ನಿಯೋಜಿಸಲಾಗಿತ್ತು ಮತ್ತು ಗೋವಾದ ನೌಕಾ ಯುದ್ಧ ನೆಲೆ ಐಎನ್ಎಸ್ ಹನ್ಸಾದಿಂದ ನಿಯಮಿತವಾಗಿ ಹಾರಾಟ ನಡೆಸುತ್ತಿದ್ದವು.